Баян-Өлгий аймгийн ноолуурын ченж Б, Х гэдэг ах дүү нарын амийг нь хөнөөн, машинтай нь шатаасан хэрэг өнгөрсөн дөрөвдүгээр сард тус аймагт гарсан. Уг хэргийг Баян-Өлгий аймгийн Баяннуур сумын харьяат 20- 22 настай Ш.Аделбек, К.Ерлан, Ж.Ганибет нар бүлэглэн үйлдсэн нь тогтоогдсон юм. Харин аравдугаар сарын 12-нд болох байсан ч хойшлоод байсан эл  хэргийн шүүх хурал өнгөрсөн баасан гаригт Баян-Өлгий аймгийн Сум дундын шүүхэд болж, тэдэнд цаазын дээд ял оноожээ.

Өнгөрсөн дөрөвдүгээр сарын 14-нд ах дүү хоёр ноолуурын ченж бусдаас их хэмжээний ноолуур авахаар боллоо хэмээн гэрээсээ 20 сая төгрөгтэй гарсан ч сураггүй болж, цагдаагийнхан тэдний цогцос болон шатсан машиныг долоо хоногийн дараа тус аймгийн Баяннуур сумаас 10 гаруй км-т орхисон байсныг олсон. Хэрэг гарснаас долоо хоногийн дараа ченжүүдийг хөнөөхөд голлох үүрэг гүйцэтгэж, хэргийг толгойлсон К.Ерлан гэгч нь нууцаар БНХАУ-ын хил даван, Шинжаан руу зугтсан байна. Эхэндээ дээрх хэрэгт Ш.Адалбек, Ж.Ганибет нарыг сэжиглэн шалгаж байсан ч мөрдөн байцаалтын явцад хэргийг хамтран үйлдсэн К.Ерлан гэгч хил давсан болох нь тогтоогджээ. Цагдаагийн байгууллага энэ тухай БНХАУ-ын хууль хяналтын байгууллагад мэдэгдэж, улмаар тус улсын цагдаа нар Шинжаанд бүгж байсан К.Ерланыг эрэн сурвалжилж, баривчлан манай талд хүлээлгэн өгсөн байна.