Улсын дуурь, бүжгийн эрдмийн театрын уран бүтээлчид өнгөрсөн долоо хоногт Ж.Вердийн “Аида” дууриар 49 дэх улирлын нээлтээ хийсэн. Долоо хоног бүрийн амралтын өдрөөр сонгодог урлагт шимтэн дурлагчдыг урин далладаг дуурийн театрын тайзнаа өнөөдөр 17.00 цагаас  Б.Дамдинсүрэнгийн “Учиртай гурван толгой” үндэсний дуурийг толилуулна. Дуурийн Юндэнд Гавьяат жүжигчин М.Болд, Нансалмаад Соёлын тэргүүний ажилтан Ш.Наранчимэг, Балганд гоцлол дуучин Э.Бумхүү, худалдаачинд Соёлын тэргүүний ажилтан Ц.Баттөр, Хоролмаад Соёлын тэргүүний ажилтан Д.Туяа нар тоглох юм байна. Харин симфони найрал хөгжмийг Урлагийн гавьяат зүтгэлтэн, театрын ерөнхий удирдаач Ж.Бүрэнбэх удирдах юм. Харин маргааш 17.00 цагт Улсын дуурь, бүжгийн эрдмийн театрын тайзнаа 49 дэх улирлын балетын тоглолтыг нээн Оросын суут хөгжмийн зохиолч П.И.Чайковскийн “Хунт нуур” балетыг толилуулах нь ээ. Гурван бүлэг дөрвөн үзэгдэл бүхий энэхүү балетын Одеттад театрын гоцлол бүжигчин, үзэгчдийн хайртай “хун” Б.Саруул гоцлох юм.