“Монгол ньюс” мэдээллийн төвд өнөөдөр хараа хамгаалах дэлхийн өдөрт зориулан хэвлэлийн бага хурал хийлээ. Тус хуралд Эрүүл мэндийн яамны Нүдний ерөнхий мэргэжилтэн, Нарийн мэргэжлийн зөвлөлийн дарга, ЭМШУИС-ийн профессор Ш.Баасанхүү, Эрүүл мэндийн яамны Нарийн мэргэжлийн зөвлөлийн нарийн бичгийн дарга, ЭМШУИС-ийн Нүд, судлалын тэнхмийн эрхлэгч, доктор Д.Уранчимэг, ЭМЯ-ны нарийн мэргэжлийн зөвлөлийн гишүүн,  Эх хүүхдийн эрүүл мэндийн үндэсний төвийн нүдний тасгийн эрхлэгч, клиникийн профессор, анагаах ухааны доктор М.Алтанхүү, Сүхбаатар дүүргийн нүдний эмч н.Адъяа нар оролцож, дэлхий даяар өнөөдөр тохиож буй хараа хамгаалах өдрийн талаар сэтгүүлчдэд мэдээлсэн юм. Тус өдрийг дэлхий даяар аравдугаар сарын хоёр дахь долоо хоногийн пүрэв гаригт тэмдэглэдэг аж. Энэ өдөр орон бүр хүн ардынхаа хараа хамгаалах үйлсийн төлөө хийсэн бүтээсэн, цаашид хийх ажлаа ярилцдаг юм байна.

Эрүүл мэндийн яамны Нүдний ерөнхий мэргэжилтэн, Нарийн мэргэжлийн зөвлөлийн дарга, ЭМШУИС-ийн профессор Ш.Баасанхүү энэ үеэр “Дэлхийн эрүүл мэндийн байгууллагаас 90-ээд оны сүүлчээр дэлхий дээр 45 сая сохор хүн байна гэж мэдээлсэн. Үүний 80 хувь нь зайлсхийж буюу урьдчилан сэргийлж, эмчилж болох сохор байна хэмээн мэдээлжээ. Тэдний тооцоолсноор энэхүү тоо 2020 он гэхэд хоёр дахин ихэснэ гэсэн судалгаа гарчээ. Тиймээс дэлхийн эрүүл мэндийн байгууллага зайлсхийж болох сохрыг устгах санаачилга гаргаж, энэ чиглэлийн үйл ажиллагаа явуулдаг 10 гаруй байгуулагуудыг нэгтгэн уриалга гаргасан. Үүнд бүх орны Засгийн газар нэгдэж орсон. 2003 онд манай Засгийн газар нэгдэн орж, үе шаттайгаар үндэсний стратеги төлөвлөгөө боловсруулаад ажиллаж байгаа. Өнгөрсөн оны сүүлээр эхний долоон жилийн ажлаа дүгнэсэн. Одоо үлдсэн арван жилдээ тав таван жилээр хоёр үе шаттай үйл ажиллагаа явуулан ажиллахаар төлөвлөөд байгаа” хэмээн мэдээлсэн юм.

Энэ жил дэлхийн хараа хамгаалах өдрийг “Сохрол, сул харааг бууруулахад хамтран зүтгэе” уриан дор тэмдэглэж байгаа бөгөөд үүгээр зөвхөн эрүүл мэндийн байгууллага, эмч мэргэжилтэн нар бус, ард түмэнтэйгээ хамтран зүтгэж, энэ талын ойлголт, мэдээллийг илүүтэй өгч, ажиллах юм байна.