“Төрийн мэдээлэл” эмхтгэлийн энэ удаагийн дугаарт Хурдан морины шигшмэл болон бүсийн уралдааны 2010 оны хуваарийг тогтоох тухай Засгийн газрын тогтоолыг нийтэллээ. “Их хурд-5” Монголын шигшмэл хурдан морины уралдааныг долдугаар сарын 21-ний өдөр Улаанбаатар хотод, Төвийн бүсийн зуны уралдааныг 2010 оны 7 дугаар сарын 28-29-ний өдөр Орхон, Сэлэнгэ аймагт, Хангайн бүсийн зуны уралдааныг 2010 оны 7 дугаар сарын 28-29-ний өдөр Хөвсгөл аймагт, Зүүн бүсийн зуны уралдааныг 2010 оны 7 дугаар сарын 28-29-ний өдөр Хэнтий аймагт, Баруун бүсийн зуны уралдааныг 2010 оны 7 дугаар сарын 28-29-ний өдөр Говь-Алтай аймагт зохион байгуулахаар шийдвэрлэжээ.
Түүнчлэн Авлигын эсрэг хуулийн 14 дүгээр зүйлийн 14.1-д “…албан тушаалтны хөрөнгө орлогын мэдүүлгийг тухайн оны 2 дугаар улиралд багтаан “Төрийн мэдээлэл” эмхтгэлд хэвлэн нийтлэх…” гэж заасны дагуу Авлигатай тэмцэх газраас бэлтгэн ирүүлсэн албан тушаалтнуудын 2009 оны хөрөнгө орлогын мэдээллийг бүрэн эхээр нь нийтэллээ. Монгол Улсын Ерөнхийлөгч,Улсын Их Хурлын дарга, Ерөнхий сайд, УИХ-ын гишүүд, Засгийн газрын гишүүд, Үндсэн хуулийн цэцийн гишүүд, Улсын дээд шүүхийн шүүгчид, Улсын Ерөнхий прокурор, Монгол банкны ерөнхийлөгч, Авлигатай тэмцэх газрын дарга болоод Санхүүгийн зохицуулах хорооны дарга, гишүүд зэрэг албан тушаалтнуудын хөрөнгө орлогын байдалтай эмхтгэлийн хуудаснаас танилцах болно. Мөн Агентлагийн дарга нар, аймгуудын Иргэдийн төлөөлөгчдийн хурлын болоод Засаг дарга нарын хөрөнгө орлогын байдлыг ч нийтэлсэн байгаа.

                                   “Төрийн мэдээлэл” эмхтгэлийн редакци