Зүүн хойд Азийн орнуудын хуульчид жил бүрийн есдүгээр сард БНХАУ-д  форум зохион байгуулдаг уламжлалтай байв. Харин өнгөрсөн жил болсон уулзалтаас гурав дахь удаагийн форумыг Монгол Улсад хийхээр товложээ. Үүний дагуу энэ сарын 13-15-нд Улаанбаатар хотод Зүүн хойд Азийн хуульчид чуулах гэж байна. Тус форумыг Монголын өмгөөлөгчдийн холбоо зохион байгуулах ажээ.

Энэ удаагийн форумаар таван улсын 120 хуульч, өмгөөлөгч чуулж Зүүн хойд Азийн орнуудын санхүүгийн хамтын ажиллагаан дахь хууль эрх зүйн асуудал зэрэг сэдвийн хүрээнд найман илтгэл хэлэлцүүлэхээр төлөвлөжээ.

Хэлэлцэх асуудал нь бүсийн орнуудын хувьд  ихээхэн ач холбогдолтой  төдийгүй хууль тогтоогч, хуульч, судлаач, эрдэмтэд, бизнес эрхлэгчдийн анхаарлын төвд байгаа сэдвийг хөндөхөөрөө онцлог юм байна. Бүс нутгийн орнууд хууль эрх зүйн тулгамдсан асуудлаар нэгдсэн шийдэлд хүрэх, харилцан туршлага солилцох, хамтын ажиллагааг хөгжүүлэхэд форумын  ач холбогдол оршино гэж зохион байгуулагчид үзэж байгаа ажээ.