Жил бүрийн гуравдугаар сарын 1 буюу МАХН-ын байгуулагдсан өдрийг Эх орончдын өдөр болгон тэмдэглэх болсоор багагүй хугацааг үдэж байна. Өнөөдөр МАХН-ынхан 89 жилийнхээ ойн баярыг тэмдэглэж, үдээс өмнө жанжин Сүхбаатарын хөшөөнд цэцэг өргөсөн. Харин одоо Монгол бөхийн өргөөнд МАХН-ын ойд зориулсан үндэсний бөхийн барилдаан болж байна. Хүчит бөхийн барилдаанд 128 бөх зодоглох юм байна. Тодруулбал, Улсын харцага Д.Баасандорж, Улсын гарьд И.Доржсамбуу, Улсын харцага Ө.Бат-Орших тэргүүтэй бөхчүүд хүч үзэх нь ээ. МАХН-ын дарга С.Баяр эзгүй байгаа тул бөхийн барилдааныг нээж МАХН-ын ерөнхий нарийн бичгийн дарга У.Хүрэлсүх үг хэлсэн юм. Тэрбээр ирсэн зочид, төлөөлөгчид хийгээд үзэгчдэд бүгдэд нь Эх орончдын өдрийн мэндийг хүргэлээ.

Бөхийн барилдааныг УИХ-ын дарга Д.Дэмбэрэл, Монгол Улсын Шадар сайд М.Энхболд тэргүүтэй МАХН-ын гишүүд үзэж, сонирхож байна.