Өнгөрсөн долоо хоногт Монголын Засгийн газар “Айвенхоу Майнз”, “Рио Тинто” группийн төлөөлөгчдөд “Оюутолгой”-н хөрөнгө оруулалтын гэрээнд өөрчлөлт оруулах асуудлаар хэлэлцээ хийхийг уриалсан мэдэгдэл явуулсан байна. Үүний хариуд “Айвенхоу Майнз”, “Рио Тинто” групп Оюутолгойн 2009 оны хөрөнгө оруулалтын гэрээнд өөрчлөлт оруулах бодолгүй байгаагаа илэрхийлсэн хамтарсан мэдэгдлийг Засгийн газарт явуулсан талаар “Айвенхоу Майнз” компанийн албан ёсны вэб сайтад бичжээ. Өчигдөр УИХ-ын намрын чуулганыг нээж үг хэлэхдээ УИХ-ын дарга Д.Дэмбэрэл “Оюутолгойн хөрөнгө оруулалтын гэрээнд өөрчлөлт оруулж, Засгийн газрын эзэмшлийн хэмжээг 50 хувьд хүргэх ёстой” хэмээн мэдэгдсэн байгаа. Өнгөрсөн есдүгээр сарын 7-нд УИХ-ын нэр бүхий 20 гишүүн Оюутолгойн хөрөнгө оруулалтын гэрээнд өөрчлөлт оруулах  саналаа Засгийн газарт оруулснаар гэрээг эргэн харах асуудал сөхөгдсөн юм.
“Айвенхоу Майнз” компанийн вэб сайтад бичсэнээр бол тэд мөн Монголын Үндэсний Аюулгүй байдлын зөвлөлд албан мэдэгдэл илгээж, Засгийн газрыг гэрээ байгуулахдаа амласан амлалтаа зөрчихгүй байхад дэмжлэг үзүүлэхийг хүссэн байна.

“Айвенхоу Майнз” манай Засгийн газарт ирүүлсэн мэдэгдэлдээ Монголын Засгийн газар 2009 онд байгуулсан хөрөнгө оруулалтын гэрээний үүргээ биелүүлж, гэрээг өөрчлөхгүй гэдэгт найдаж буйгаа илэрхийлсэн байна. Олон жил дуншсан Оюутолгойн хөрөнгө оруулалтын гэрээг Монголын Засгийн газар, “Айвенхоу Майнз”, “Рио Тинто”-гийн гурван талын төлөөлөгчдийн харилцан зөвшилцлийн  дүнд 18 сарын өмнө хуулийн дагуу байгуулж, үзэглэсэн бөгөөд  уг гэрээнд  зааснаар алт зэсийн асар их нөөцтэй Оюутолгой ордын эзэмшлийн 66 хувийг “Айвенхоу Майнз” эзэмших болсон юм. Харин тус компанийн эзэмшлийн хувьцааны 49 хувийг эзэмшдэг “Рио Тинто” групп төслийн шууд бус гүйцэтгэгч нь юм. Ямартай ч өнгөрсөн сард Оюутолгойн орд дахь бүтээн байгуулалтын 50 хувийг гүйцэтгэснээ тэмдэглэсэн “Айвенхоу Майнз”, “Рио Тинто” групп энэ удаагийн хамтарсан мэдэгдлээрээ дамжуулан “Монголын Засгийн газар хөрөнгө оруулалтын гэрээнд өөрчлөлт оруулвал Монголд хөрөнгө оруулагчдын итгэлийг эвдэж, эдийн засагт сөргөөр нөлөөлж болзошгүй” гэж үзэж буйгаа илэрхийлсэн байна.