Үндэсний аюулгүй байдлын зөвлөлийн ажлын албаны дарга Б.Хурц ажилдаа эргэн оржээ. Түүнтэй холбоо барихын тулд өөрийнх нь 881037.. дугаар руу залгахад холбогдох боломжгүй байлаа. Мөн Үндэсний аюулгүй байдлын зөвлөлийн албаны хоёр ч ажилтнаас мэдээлэл авах гэсэн боловч бүтээгүй юм. Б.Хурцын ар гэрийнхэн нь хүртэл түүнтэй хялбархан холбоо барьж чадахгүй байгаа аж. Үүнээс үзэхэд тэрбээр хэсэгтээ хэвлэлийнхнээс нуугдахаар шийдсэн бололтой.

Харин “Зайсан” цогцолбор дахь Б.Хурцын гэрийн орчимд сэтгүүлчдийг эс тооцвол харьцангуй эл хуль байлаа. Манай сурвалжлах багийнхан гэрт нь очиж, түүнтэй холбогдох гэсэн боловч “Зайсан” цогцолборын харуулууд оруулсангүй. Тэд “Ийшээ гадны хүн, машин оруулахгүй байгаа. Манай энд жаахан асуудал гарсан” гэснээс өөр зүйл хэлээгүй юм. Харин уржигдар “Чингис хаан” нисэх онгоцны буудал дээр Б.Хурцыг тосч авсан машинууд “Зайсан” цогцолбор руу орж, гарч байгаа нь харагдав. Тэгэхээр Б.Хурц энд гэртээ ирсэн нь тодорхой юм.

Үүнтэй зэрэгцээд Үндэсний аюулгүй байдлын зөвлөлийнхөн хуралдаж байгаа гэх мэдээлэл гарчээ. Б.Хурцыг эзгүйд Үндэсний аюулгүй байдлын зөвлөлийн ажлын албаны үүрэг гүйцэтгэгчээр Ч.Өнөрбаяр ажиллаж байсан юм. Түүнд Б.Хурцын албан ажилдаа унаж байсан машиныг хүртэл хариуцуулан өгч байжээ. Харин одоо Б.Хурц эргэн ирж, ажилдаа орсон боловч Ч.Өнөрбаярын албан тушаалыг нь хараахан өөрчлөөгүй байна. Түүнийг Б.Хурцын оронд томилогдох нь тодорхой болсон гэлцэж байсан боловч ийнхүү жинхэнэ “эзэн” нь хүрээд ирсэн учир Үндэсний аюулгүй байдлын зөвлөлийнхөн сандарч байна гэх яриа гарчээ.

Б.Хурцыг өнгөрсөн оны есдүгээр сарын 17-нд Английн нисэх онгоцны буудал дээрээс баривчилсан юм. Дипломат төлөөлөгчийн хувиар явж байсан ч бизнес ангиллын визээр зорчсоныхоо балгаар түүнийг баривчилсныг бид мэднэ. Жил тойрон хэлэлцсэний дүнд Английн шүүх түүнийг өнгөрсөн сарын 19-нд Германы талд шилжүүлэн өгсөн юм. Түүнээс хойш сар гаруй хугацаа өнгөрсний эцэст Б.Хурц эх орондоо хөл тавив. Уг нь түүний шүүх хурал Берлинд ирэх сарын 24-нд болохоор товлогдоод байсан юм. Өнгөрсөн долоо хоногт батлан даалтад гарсны дараа Б.Хурц Сөүлд очиж, эмчилгээ хийлгэсэн. Энэ үед Германы талаас “Танай хүн одоо чөлөөтэй болсон” хэмээн Монголын төлөөлөгчдөд мэдэгджээ. Эцэст нь Б.Хурц НҮБ-ын Ерөнхий ассамблейн чуулганд оролцсон Ерөнхийлөгч Ц.Элбэгдоржтой хамт нэг онго­цоор ирсэн юм. Энэ бүх­ний дүнд Монголын дипломатч суллагдах үгүйд эргэлзсэн олон асуултын хариулт тодорхой боллоо. Гэвч яагаад германчууд Б.Хурцыг гэнэт сулласан бэ, хэрэв түүнийг гэм буруугүй гэж үзсэн бол Их Британийн Засгийн газар Монголын талаас уучлал гуйх уу гэх зэрэг олон шинэ асуулт гарч ирж байна. Б.Хурцтай холбоотой шүүх хурлын тов нь хүртэл зарлагдчихаад байхад ийнхүү суллагдсан нь түүний ард ямар нэгэн тохиролцоо байгаа гэх таамгийг баталж байна.

“Ардаа төртэй, эх оронтой хүн юундаа санаа зовох вэ” хэмээн Б.Хурц Улаанбаатарт хөл тавьсан даруйдаа хэлсэн юм. Үнэхээр Монголын төр нэг иргэнээ хамгаалж чаджээ. Энэ тухай “Ирэх сарын эхээр Германы Канцлер Ангела Меркель Монголд айлчлах гэж байгаатай холбоотойгоор Б.Хурц суллагджээ” хэмээн “Синьхуа” агентлаг мэдээлсэн байна. Гадаад  харилцааны дэд сайд Б.Болор “Б.Хурцаас болж Монгол, Германы харилцаанд ямар ч сэв суугаагүй” хэмээн мэдэгдсэн. Харин “www.upi.com” сайтад “Монголчууд Германтай найрсаг байдлаа хадгалж чадав. Гэхдээ энэхүү хэрэг явдал Их Британи, Монголын харилцаанд сэв суулгалаа” гэж онцолжээ. Английн “Телеграф” сонинд “Их Британиас Монголд суугаа Элчин сайд Уиллъям Диксоныг эргүүлэн татсан явдал хоёр орны харилцаанд сэв суусныг харуулж байна” хэмээн өмнө нь бичиж байв. Харин Их Британийн Гадаад хэргийн яамны өмгөөлөгч Клейр Доббин “Манай Засгийн газар Б.Хурцыг баривчлуулах сонирхол байгаагүй” хэмээн мэдээлж байсан юм.