Сэлэнгэ аймагт өнгөрсөн шөнө орсон их хэмжээний цас болон цасан шуурганы улмаас хэд хэдэн сумд цахилгаангүй болоод байна. Их хэмжээний цасны улмаас Дархан-Уул аймаг, Сэлэнгэ аймагт үүссэн замын хүндрэлийг Сэлэнгэ, Дархан-Уул аймаг, Улаанбаатар хотын Автозамын ашиглалт засвар, арчлалтын газруудаас  бригадууд гарч, цэвэрлэгээ хийсэн тул авто зам хаагдаагүй талаар нийслэлийн Онцгой байдлын газраас мэдээлэв. Харин Дархан-Уул аймгаас Сэлэнгийн зам дагуух өндөр хүчдэлийн тулгуур баганууд унасан тул одоогоор Дархан-Уул аймгийн Дархан сум, Сэлэнгэ аймгийн Хүдэр, Ерөө сумд цахилгаангүй байна. Улаанбаатар, Дархан-Уул, Сэлэнгэ аймгийн аваарын бригадууд тус бүс нутагт тэдгээр тулгуур багануудыг сэргээн босгохоор ажиллаж байгаа ажээ. Түүнчлэн өнгөрсөн шөнө орсон их цасны улмаас Дархан-Уул аймгаас Улаанбаатарын чиглэлийн замын 114 дүгээрт байрлах 16 тулгуур багана унасан бөгөөд үүнийг засварлахаар холбогдох байгууллагын хүмүүс ажиллаж байгаа хэмээн Нийслэлийн онцгой байдлын 105 тусгай дугаараас мэдээллээ.