Үндэсний аюулгүй байдлын зөвлөлийн Ажлын албаны дарга Б.Хурц дөнгөж сая “Чингис хаан” нисэх онгоцны буудалд газардлаа. Манай сурвалжлагч түүнийг онгоцноос буусны дараа утсаар холбогдож, дараах асуултад хариулт авсныг хүргэж байна.

-Таныг эх орондоо ирлээ гэж сонслоо?

-Дөнгөж сая буулаа. Нутгийн агаар сайхан байна.

-Таныг ирсэнд итгэж чадахгүй байна. Яаж ирэв?

-Яах вэ? Явсан шигээ л хүрээд ирлээ.

-Германы тал таныг яаж явуулав?

-Намайг “Та чөлөөтэй л гэж хэлсэн”. 

-Та бүтэн жил хэний буруугаас болж хоригдчихов?

-Хэний буруу, зөвийг би мэдэхгүй. Учир нь олдох байлгүй дээ.

-Та нутгаа санав уу?

-Саналгүй яахав. Миний төлөө санаа зовж байсан хүн бүхэнд баярласнаа өөрөөр чинь дамжуулан илэрхийлж болох уу?

-Таны тухай янз бүрээр ярьж байхад санаа тань зовж байв уу?

-Юм  юм л сонсогдсон. Ардаа төртэй, эх оронтой хүн юундаа ч санаа зовох билээ.

-Та болсон явдлын талаар 2 өгүүлбэрээр хэлэх боломж байна уу?

-Ах нь төрд үүрэг хүлээсэн, тангараг өргөсөн цэрэг хүн. Бас хамаагүй ярьж болохгүй зүйл гэж байна шүү дээ дүү минь. Гэхдээ шаардлага гараад ярь гэвэл зарим зүйлийг ярих болно.

-Таныг Ерөнхийлөгчтэй хамт нэг онгоцоор ирлээ гэж сонслоо.

-Тэглээ. Ерөнхийлөгчтэй хамт ирлээ.

-Та хэзээ ажилдаа орох вэ?

-Дарга намайг шууд ажилдаа ор гэсэн. Уг нь би амраагүй яваа л даа. /Инээв/ Одоо ингээд ажил руугаа очно доо.
 
-Та Сөүлээс ирэв үү?

-Тэглээ. Бие хаагаа үзүүлчихээд.

-Таны бие сайн уу?

-Сайн сайн баярлалаа. За баяртай гэснээр утас тасрав.

Тун удахгүй бид Үндэсний аюулгүй байдлын зөвлөлийн Ажлын албаны дарга Б.Хурцын "Чингис хаан" нисэх онгоцны буудалд газардах үеийн сурвалжлагыг хүргэх болно.