УИХ-ын гишүүн Х.Наранхүү “Эрдэнэт” үйлдвэрийн захирал байхдаа их хэмжээний хө­рөнгө хувьдаа завшсан гэх үндэслэлээр сэ­жигтнээр татагдсанаасаа хойш чимээгүй бол­чихлоо. Авлигатай тэмцэх газрын мөрдөн бай­цаагч “УИХ-ын гишүүн Х.Наранхүүгийн эд хөрөнгийг битүүмжилж, яллах саналыг нийс­лэлийн Прокурорын газарт тавьсан” гэх мэдээлэл бий. Мөн түүнийг Монгол Улсаас гарахыг буюу хил давахыг хориглосон гэж байгаа. Ха­рин энэ талаар нийслэлийн Прокурорын газ­рын нэгдүгээр албаны хяналтын прокурор Т.Жа­дамбаагаас тодруулахад “Мөрдөн бай­цаалт дуусаагүй байна. Эд хөрөнгийг нь би­түүмжилсэн, хил давахыг нь хориглосон зүйл байхгүй. Мөрдөн байцаалт ирэх сарын сүүлчээр дуусах байх” гэх хариултыг өглөө. Авлигатай тэмцэх газрын зүгээс “Мөрдөн байцаалтын ажиллагааны явцад хөрөнгө битүүмжлэх, батлан даалт, барьцаа авах, хил давах эрхийг хязгаарлах талаар Эрүүгийн байцаан шийтгэх хуульд мөрдөн байцаагч, прокурорын эрх хэмжээний асуудал” гэх тайлбарыг өгсөн юм. Тэгэхээр Х.Наранхүү ги­шүүний эд хөрөнгийг битүүмжилсэн, хил давахыг хориглосон талаарх мэдээлэл нь ташаа болж таарах нь. Гэхдээ УИХ-ын гишүүний бүрэн эрх, халдашгүй байдал гэж бий. Х.На­ранхүүг сэжигтнээр татаж шалгаж буй нь түү­ний бүрэн эрхт халдсан явдал биш гэдгийг нийслэлийн Прокурор болон Мөрдөн байцаах газрынхны зүгээс мэдэгдсэн юм. Харин энэ талаар хуулийн хүрээнд авч үзье. УИХ-ын ту­хай хуулийн 34.7-д зааснаар “Гишүүний бүрэн эрх эдлэхээс өмнөх хугацаанд хууль зөрчсөн үйлдэлд нь холбогдуулан баривчилсан, эрүү­гийн хэрэг үүсгэсэн бол энэ хуулийн 6.9.1, 6.9.2-т заасны дагуу бүрэн эрхийг нь түдгэл­зүүлнэ” хэмээн заасан байдаг аж. Харин 6.9.1-д зааснаар “Гэмт үйлдлийнх нь явцад эсвэл гэмт хэргийн газарт эд мөрийн баримттай нь баривчилж, улмаар бүрэн эрхийг нь түд­гэлзүүлэх тухай саналыг Улсын ерөнхий про­курор УИХ-д оруулсан”, 6.9.2-т “Гишүүнд хол­богдуулан эрүүгийн хэрэг үүсгэсэн бөгөөд Улсын ерөнхий прокурор түүний бүрэн эрхийг түдгэлзүүлэх тухай саналыг УИХ-д оруулсан” тохиолдолд бүрэн эрхийг нь түдгэлзүүлэх талаар хэлэлцэх юм. Одоогоор Улсын ерөнхий прокурор санал оруулаагүй учир бүрэн эрхийг нь түдгэлзүүлэх шаардлагагүй гэсэн үг. Тий­мээс хуулийн дагуу Х.Наранхүү гишүүн шал­гуулж, буруутай нь тогтоогдвол хэргээ үүрэ­хээс өөр аргагүй болж буй юм. Өөрийг нь сэ­жигтнээр татан шалгаж байгаа талаар эрхэм гишүүн мэдэхгүй байгаа нь хачирхалтай. Түүний туслах нь хүртэл “Одоогоор мэдсэн зүйл алга” гэж байсан удаатай. Гэхдээ тэд олны хэл амнаас эмээж мэдсэн ч мэдээгүй юм шиг царайлан ийм хариулт өгсөн байж ч болох. Гэвч хэрэг бишдэж байгааг мэдсэн УИХ-ын гишүүн Х.Наранхүү өмгөөлөгчдийн багийг ажиллуулж эхэлсэн бололтой. Учир нь түүний өмгөөлөгчид нийслэлийн Прокурорын газарт хэргийг хэрэгсэхгүй болгох хүсэлтээ гаргасан гэж буй. Тэд хүсэлтдээ хэд, хэдэн хуулийг иш татсан аж. Мөн “Эрүүгийн хэрэг үүсгэсэн нь үн­дэслэлгүй. Эрүүгийн хэргийг нягтлан харж хэрэгсэхгүй болгож өгөөч” гэсэн бичиг хүр­­гүүлжээ. Сүүлийн үед УИХ-ын гишүүд Ав­лигатай тэмцэх газарт шалгуулах нь хэвийн үзэг­дэл болсон гэхэд хилсдэхгүй. Янз бүрийн хэрэгт нэр холбогдож байсхийгээд л дуудагдаж, шуугиан тарих болсон нь парламентын нэр хүндийг унагаж байгаа талаар шүүмжлэх хэсэг ч бий. Ер нь сонгогч бид ийм шүүмжлэл хүлээхээс өөр аргагүй парламентын гишүүдийг заавал сонгох шаардлага байхгүй гэдэгт л асуудал байх шиг байна.