Нийслэлийн оюутнууд долоо хоног бүр уулздаг өдөртэй боллоо. Оюутан залуучуудад чөлөөт цагаа зөв боловсон өнгөрүүлэх газар Нийслэлийн хэмжээнд хомс байдаг. Тэгвэл долоо хоног бүрийн мягмар гарагт “Twitter`s day” буюу залуучуудад зориулагдсан дугуй ширээний уулзалтыг Нийслэлийн Ардчилсан оюутны холбоо, Ардчилсан намтай хамтран зохион байгуулахаар болсон байна. Тэд анхны уулзалтаа маргааш 18.00 цагт “Пума империал” зочид буудалд хийх аж. Харин анхны зочноор УИХ дахь  Ардчилсан намын бүлгийн дарга Ч.Сайханбилэг оролцож, залуучуудтай чөлөөт ярилцлага өрнүүлэх юм. Мөн оюутан залуус өөрсдөдөө тулгамдаж буй асуудал, түүнийг шийдвэрлэх арга замын талаар ярилцахаас гадна Ардчилсан намын бодлого үйл ажиллагааны талаар үзэл бодлоо чөлөөтэй илэрхийлж, санал солилцох боломжтой гэнэ. Энэхүү уулзалтад оролцохыг хүссэн оюутан, залуучуудад нээлттэй зохион байгуулах юм байна.