“Камертон” хамтлагийн ахлагч, дуучин Д.Болд томоохон шоу тоглолт өнгөрсөн наймдугаар сард хийнэ хэмээн мэдээлж байсан ч ирэх арваннэгдүгээр сар хүртэл хойшилжээ. Д.Болдын хэлж буйгаар тэрбээр ирэх арваннэгдүгээр сарын сүүлээр “Монгол поп” урсгалыг танилцуулах томоохон хэмжээний тоглолтыг хийхээр бэлтгэлдээ орчихсон байгаа аж. Тоглолтод түүний гаргасан бүх цомгийн хит уран бүтээл эгшиглэх бөгөөд удахгүй бас нэгэн шинэ клипээ гаргахаар төлөвлөөд байгаа гэнэ. Тэрбээр Монголын хөгжмийн урсгалт “Монгол поп” хэмээх шинэ урсгалыг гаргаж ирсэн бөгөөд энэ хүрээнд “Монгол поп” хэмээх цомгийг гаргасан. Түүний цомогт багтсан “Дөрвөн улирал” хэмээх дууны клип удахгүй телевизээр цацагдах юм байна. “Дөрвөн улирал” дууныхаа талаар дуучин Д.Болд хэлэхдээ “Монгол дөрвөн улиралтай учраас бидний амьдралын хэв маяг байнга өөрчлөгдөж  байдаг. Зузаан хувцас өмсөхөөс эхлээд л. Монголын дөрвөн улирлыг илэрхийлж хавар хайрттайгаа танилцаж, зун нь зугаалж, намар бие биедээ илүү дурлаж, өвөл хайр улам батжиж байгааг харуулсан дуу юм” хэмээн тайлбарласан.
Сонирхуулахад Д.Болд “Гурван охин” хамтлагийн дуучин Н.Солотой хамтран дуулсан “Учиртай гурав” уран сайхны киноны дуу болох “Хагацаж чадах уу?” дууны клип өчигдрөөс эхлэн цацагдаад байгаа юм.