Одоогоос 20 жилийн өмнө буюу 1990 оны гуравдугаар сарын 2-ны өдөр Монголын Ардчилсан хувьсгалд үнэтэй хувь нэмэр оруулсан Монголын оюутны холбооны онц IV бага хурал болж, гурван өдөр үргэлжилж байлаа.

Өнөөгийн нийгэмд чухал байр суурь эзэлж буй Төрийн бус байгууллага, залуусын дуу хоолой, эрх ашгийн илэрхийлэл болсон Монголын оюутны холбооны хөрс суурь энэ үед тавигдаж, тус хурлаар Монголын оюутны бие даасан байгууллагыг албан ёсоор байгуулж, олон нийт, улс төрийн байгууллага болохыг нь тунхаглан зарлаж байсныг эргэн дурсахад таатай байна.

Тухайн үед Монголын Оюутны Холбоог цэгцлэн байгуулж, үйл ажиллагааг нь удирдан чиглүүлэхэд хэсэг оюутнуудын байгуулсан “XX Зуун-Оюутны чөлөөт нэгдэл” байгууллага голлох үүрэг гүйцэтгэсэн байдаг юм. Тийм ч учраас өнгөрсөн жилээс эхлэн Монгол орон даяар тэмдэглэж буй Ардчилсан хувьсгалын 20 жилийн ойн арга хэмжээний хүрээнд “XX зуун-Оюутны чөлөөт төв” Төрийн бус байгууллага, Монголын Оюутны Холбооноос нийгэмд бий болгосон шинэ уур амьсгал, гүйцэтгэсэн үүрэг, өрнүүлсэн санаачилгыг энэ өдрүүдэд хүндэтгэн дурсаж, тус байгууллагын 20 жилийн ойг тэмдэглэж байна.
Ойн өдрийг ирэх лхагва гаригт буюу гуравдугаар сарын 3-ны өдөр тэмдэглэх бөгөөд 14.00 цагаас Ардчиллын алтан хараацай С.Зориг агсны хөшөөнд цэцэг өргөж, хүндэтгэл үзүүлэх бол Монголын оюутны Ардчилсан Хөдөлгөөний 20 жилийн ойн хүндэтгэлийн хурал энэ өдрийн 14.30 цагаас  УДЭТ-т болно.

Хурлын үеэр Монгол Улсын Баатар, УИХ-ын гишүүн Э.Бат-Үүл “Хувьсгалын II үе шат” нэртэй илтгэл тавих юм. Энэхүү илтгэлийг “Eagle” болон “Боловсрол суваг” телевизээр шууд дамжуулахыг онцолж байна.