Испанийн Ла лигийн гуравдугаар тойргийн тоглолтууд өнгөрсөн амралтын өдрүүдэд боллоо. Энэ тойрогт Каталоны нэр төр гэгддэг “Барселона” талбайдаа “Осасуна”-г хүлээн авч, 8:0 харьцаатай “ бут ниргэлээ”.  Энэ тоглолтын талаар гадны хөлбөмбөгийн зарим томоохон сайтууд “Барса уураа гаргасан нь” хэмээн бичиж байна. Тэд өмнөх тойрогтоо “Реал Сосейдад” багийн талбайд зочлон,  хоёр гоолоор тэргүүлж яваад “баригдаж”, тэнцсэн билээ. “Барса уураа гаргасан” тоглолтод  Месси гурван гоолоор хет-трик /5, 41,79/, Давид Вилла хоёр гоолоор “дубль” /34, 76/ хийж, Фабрегас 13, Роверсио 40 минутад өөрийн хаалгандаа авто гоол, Шави 57 дахь минутад гоолдсон байна. Харин тэдний мөнхийн өрсөлдөгч Эзэн хааны гэгддэг “Реал Мадрид” өнгөрсөн шөнө “Леванте”-гийн талбайд зочлон, 1:0 харьцаатай хожигдлоо. Лигийн сулхан багийн эсрэг Жозе Моуриньо Криштиан Роналдугаа сэлгээнд суулган тоглолтыг эхлүүллээ. Тоглолт эхнээсээ л “Реал Мадрид” багийн давамгайлал дор явагдан, Карим Бензема гоол оруулсан ч хаалгач дээр алдаа гаргасан гэж үзэн тооцсонгүй. Харин 40 минутад Сами Хедира хоёр дахь шар хуудсаа авч, талбайг чөлөөлсөн юм. Арвуулаа үлдсэн “Реал Мадрид” хоёрдугаар үед Ронулдугаа талбайд гаргаж, довтолгоогоо нэмэн олон гоолын боломжийг гаргаж байсан ч ашиглаж чадсангүй. Харин 68 дахь минутад “Леванте”-гаас Ароуне Коне гоолдон талбайн эзэд тэргүүлж эхэлсэн юм. Тоглолт дуустал энэ харьцаагаа хадгалж чадсанаар тэд хүчирхэг “Реал”-аас хожил, хэрэгтэй гурван оноог нь салгалаа. Энэ тоглолтод “Реал” илүү байж, тоглолтын турш 65 хувьд нь бөмбөг эзэмшсэн ч хожиж чадсангүй.

Лигийг тэргүүлэгч “Валенсия”, “Спортинг Гиён” талбайд зочлон Солдадогийн ганц гоолоор буулган авлаа. Мэргэн буучийн жагсаалтыг таван гоолтой Месси, Солдадо нар тэргүүлж эхэлсэн.