Говь-Алтай аймгийн соёлын салбарын нийт ажилтан, албан хаагчид жил бүрийн есдүгээр сарын хоёр дахь долоо хоногийн ням гаригт тохиодог соёлын ажилтны өдрийг хамтран тэмдэглэлээ. Энэхүү арга хэмжээнд тус аймгийн 16 сум, гурван мэргэжлийн урлагийн байгууллагын 120 гаруй соёлын ажилтан оролцсон байна. Энэ үеэр соёлын салбарт үр бүтээлтэй ажиллаж байгаа зарим хүмүүсийг шагнажээ.

Үүнд, шилдэг номын санчаар нийтийн номын сангийн Г.Энхцэцэг, Тайшир сумын Д.Байгаль, шилдэг удирдагчаар ардын дуу, бүжгийн “Алтай” чуулгын дарга Ц.Энхболд, шилдэг уран бүтээлчээр бүжигчин Б.Мөнхсүлд, шилдэг соёлын төвийн эрхлэгчээр Баян-Уул сумын Н.Ганцэцэг, шилдэг хөгжмийн багшаар Цогт сумын Б.Отгонжаргал, шилдэг музейн ажилтнаар Н.Мөнхцэцэг, орон нутгийн судлах төвийн шилдэг ажилтнаар Жаргалан сумын П.Нэргүй нар шалгарчээ. Мөн энэ үеэр гар бөмбөг, шатар, гар барилдааны тэмцээн зохион байгуулж, тэргүүн байр эзэлсэн хүмүүст медаль, мөнгөн шагнал гардуулсан байна.