3,423.28
Олон улсын Валютын сангийн тэргүүн асан Доминик Стросс-Кан сэтгүүлч эмэгтэй Тристан Баноныг эргүүлэх санаатай байснаа хүлээн зөвшөөрөөд харин түүнийг хүчиндэх гэснээ эрс үгүйсгэсэн гэж эх сурвалжийн хэлснээс иш татан “Agence France-Presse” мэдээлэв. Стросс-Кан есдүгээр сарын 15-нд цагдаагийн газар мэдүүлэг өгөхдөө ингэж мэдэгджээ.L’Express порталын мэдээнд Стросс-Кан мэдүүлэг өгч байхдаа сэтгүүлч эмэгтэйг үнсэхээр оролдоход бүсгүй эсэргүүцсэний дараа оролдлогоо зогсоосон гэж хэлснийг өгүүлжээ.
Сэтгүүлч Банон Стросс-Канаас номондоо зориулан ярилцлага авч байсан 2003 онд тэрээр түүнийг хүчиндэхээр оролдсон гэж байгаа юм. Стросс-Каныг хүчингийн хэрэгт сэжиглэн Нью-Йоркт баривчлагдсаны дараа сэтгүүлч эмэгтэй гомдлоо гаргажээ. Стросс-Канын Америкийн хэрэг нь гомдол гаргагч худал мэдүүлэг өгсөн хэмээгдэн хаагдсан юм.
Баноны гомдол бол тэр сэтгүүлчийн уран сэтгэмж хэмээн Стросс-Кан мэдэгдээд түүнийг гүтгэсэн хэмээн эсрэг гомдол гаргаад байна. Энэхүү хэрэг явдлуудаас болж Стросс-Кан ОУВС-гийн тэргүүний албан тушаалаас огцорсан. Тэрээр баривчлагдсаныхаа дараахан албан тушаалаасаа огцорсон юм. Түүний оронд ОУВС-гийн тэргүүнээр Францын Сангийн сайд байсан Кристин Лагард томилогдсон билээ.
Ш.МЯГМАР
"Ардын эрх" сонин
