Төв цэнгэлдэх хүрээлэнгийн дэвжээнээ хүчит бөхийн барилдааны нэгийн даваа эхлээд байна. Уг барилдаанд Дархан аварга Б.Бат-Эрдэнэ, улсын арслан Г.Эрхэмбаяр, улсын гарьд Ж.Баяржавхлан, улсын гарьд И.Доржсамбуу, улсын гарьд н.Ганбаатар, улсын заан н.Бат-Эрдэнэ зэрэг олон улсын цолт бөхчүүдээс гадна аймаг, сумын цолтой бөхчүүд хүчийг үзэж байна. Мөн энэ наадмын нэг онцлог нь аймаг, аймгаас 200-400 орчим бөхчүүд зодоглож байгаа учраас барилдааны төгсгөл хэсэг рүү гал, галаас гал авалцсан сайхан барилдаан гарах төлөвтэй байна.

Дархан аварга Б.Бат-Эрдэнэ наадмын тухай хуучлахдаа “Өнөөдөр бол түүхэн том үйл явдал тохиож байна. Төв цэнгэлдэх хүрээлэнд хуран цугласан энэ олон бөхчүүдээ хараад үнэхээр бахархах сэтгэл төрлөө. Монгол бөхийнхөө дэг жаяг ёс уламжлалыг бид хойч үедээ өвлөн уламжлуулах ёстой. Эрт дээр үеэс монголчууд бөхдөө хамгийн эрхэм дээд зан суртахууныг өвлүүлж ирсэн байдаг. Энэ ч утгаар нь “Дээлтэй монгол”, “Нутгийн хөх салхи” гэсэн хөтөлбөрүүдийг хэрэгжүүлж ирсэн. Хөтөлбөр ч амжилттай хэрэгжиж байна” гэж ярилаа.

Хүчит бөхийн барилдааныг “ТВ-9 телевиз”-ийн уран бүтээлчид орон даяар шууд дамжуулан үзэгчдэд хүргэж байна.