УИХ-ын чуулганы үдээс хойшхи хуралдаан үргэлжилж байна. Түүгээр Цагдаагийн байгууллагын тухай хуулийн шинэчилсэн найруулгын төсөл болон Монгол Улсын цагдаагийн байгууллагын тухай хуулийг хүчингүй болсонд тооцох тухай, Гэмт хэргээс урьдчилан сэргийлэх тухай хуульд нэмэлт оруулах тухай, Галт зэвсгийн тухай хуульд нэмэлт өөрчлөлт оруулах тухай хуулийн төслүүдийн хэлэлцэх эсэхийг шийдвэрлэхээр гишүүд асуулт тавьж, холбогдох хүмүүсээс хариулт авч байна.

Шинэчилсэн найруулгад Цагдаагийн байгууллагын бие бүрэлдэхүүнийг чадавхижуулах, тэдний нийгмийн асуудлыг сайжруулахад түлхүү анхаарахыг гол зорилгоо болгожээ. Хэлэлцүүлгийн шатанд гишүүн Ж.Энхбаяр Цагдаагийн ерөнхий газрын даргыг Ерөнхий сайдын санал болгосноор томилдог, орлогчийг бас уг албан тушаалтны санал болгосноор томилдог тогтолцоотой. Сонгуулийг пропорцианаль тогтолцоогоор явуулдаг болсон нөхцөлд Цагдаагийн удирдлагуудын томилгоо хүндрэлтэй байдалд орно гэсэн анхааруулгыг өглөө.

Одоо энэхүү хуулийн төслийг УИХ-ын Хууль зүйн байнгын хорооны хуралдаанаар авч хэлэлцсэн талаарх санал дүгнэлтийг сонсч байна. Санал дүгнэлтийг УИХ-ын гишүүн Ж.Энхбаяр танилцуулж байна.

Г.Дарь