3,423.28
Монголын сэтгүүл зүйн шинэ цагийн түүчээ, нэрт сэтгүүлч Ц.Балдорж агсны нэрэмжит шагналын эзэд өчигдөр орой тодорлоо. Бүтэн жилийн турш таван үе шаттайгаар явуулсан энэ удаагийн шалгаруулалтад нийт 208 бүтээл ирснээс 12 бүтээлийг шигшиж үлдээсэн байв. Тэдгээрээс “Хялганат талын цагаан зээр хар цээр бишээ” нийтлэл, “Цагаан сараар л юмдаг” тэмдэглэлээрээ “Өдрийн сонин”-ы ерөнхий эрхлэгчийн зөвлөх Ж.Гангаа тэргүүлж, “Балдорж шагнал”-ын эзэн болсон бол дэд байрыг МҮОНРТ-ийн сэтгүүлч Д.Бямбацэцэг “Хар тамхи цагаан тахал”, “Өвчний хуурамч түүх ЭМД-ын санг цөлмөж байна” зэрэг асуудал хөндсөн нэвтрүүлгээрээ хүртсэн юм. Түүнчлэн шилдэг аравт дараах сэтгүүлчид шалгарчээ.- Сэтгүүлч Б.Золбаяр “Намар ай”, “Мэлмийн солонго” эссэ бүтээлээрээ,
- “Өнөөдөр” сонины сэтгүүлч Д.Заяабат “Найзыгаа алчихлаа гэж бодоод ууланд дөрвөн жил бүгсэн”, “Эсэргүү” Төмөр-Очирыг хэн егүүтгэв. Оросууд уу, манайхан уу” эрэн сурвалжлах нийтлэлээрээ,
- “Өнөөдөр” сонины сэтгүүлч Д.Оюун-Эрдэнэ “Хятад сүлжээ буюу Монголын хар алтыг атгасан Winsway” цуврал, “Монголын стратегийн ордууд ард түмний мэдлээс гарчээ” цуврал нийтлэлүүдээрээ,
- “Үндэсний шуудан” сонины сэтгүүлч Б.Ганчимэг “Ц.Нямдорж: Аав ээж хоёрыгоо ганц сайхан дуулчихаад Энхбаярын шүүхээр буудуулна даа”, “Х.Баянмөнх: Аатай омогтой, алдаатай хийморьтой залуу насны явдлыг байгаагаар нь хайрлая л гэж хэлэх гэсэн. Мөөеө ирээгүй” ярилцлагаараа,
- “Үндэсний шуудан” сонины тоймч Г.Отгонбаяр “Агуу хүний солиорох нь ч агуу”, “Хуваарилалт нь шог байна, Ерөнхий сайд аа“ нийтлэлээрээ,
- “Өнөөдөр” сонины тоймч Ш.Даваадорж “Монголчуудыг чөдрийн ганцаас нь салгах хэнд ашигтай вэ”, “Монголд дайн болж байна уу” нийтлэлээрээ,
- Монголын үндэсний олон нийтийн телевизийн сэтгүүлч П.Алтанцэцэг “Гишгэх газаргүй Монгол” теле нийтлэл, “Төрийн хар хүн” хөрөг нэвтрүүлгээрээ,
- “Өдрийн сонин” Н.Гантулга “Шинэдийн саран тунгалагших цаг дор” тэмдэглэл, “Владимир Жанибеков: Тавхан удаа сансарт ниссэндээ харамсдаг” ярилцлагаараа,
- “Улс төрийн тойм” сонины эрхлэгч Л.Мөнхбаясгалан “Уучилчихаач дээ”, “Жон Фрамыг иртэл шүү” нийтлэлээрээ,
- “TV-9” телевизийн сэтгүүлч Б.Отгон “Цэнгийн үнэгүй цэнхэр алт”, “Орхон голд амьдрал төгсөхийн цагт” нэвтрүүлгээрээ тус тус “Балдорж” шагналын шилдэг аравт жагслаа.
“Балдорж” шагналын эзэн болсон, “Өдрийн сонин”-ы ерөнхий эрхлэгчийн зөвлөх Ж.Гангааг шижир алтан тэмдэг, болор цомоос гадна 5000 ам.долларын мөнгөн шагналаар шагнаж, урамшуулснаас гадна шилдэг 12-т багтсан сэтгүүлчдийг “Улаанбаатар” банк ивээн тэтгэж, гадаадад аялуулах болсон байна.
Г.Дарь
Гэрэл зургийг: "Өнөөдөр" сонин.
