Намрын тэргүүн сарын цагаан шүүдэр буух шинийн 11-нд Монгол Алтайн нурууны үргэлжлэл Хантайшир, Хар азарга, Хасагт хайрхан, Хөвч, Хөх сэрх, Гичгэнэ, Эдрэнгийн нуруунд цасан бүрхүүл тогтжээ. Ялангуяа Эрдэнэ, Чандмань сумын нутагт 20-25 см зузаан цас орсон байна. Энэ нь хатуухан өвөл болохын дохио юм болов уу.

Говь-Алтай аймгийн нутагт сүүлийн хоёр жилд зуншлага сайтай, өнтэй өвөл болсон болохоор малчдын сэтгэл тэнэгэр, мал сүрэг нь тарга тэвээрэг сайтай өсч, онд оролт 96.36 хувьтай байгаа ажээ.