Илүү шинэ, илүү хүчирхэг араатан гэтэж айсуй. Acer-ийн шинэ гаргасан энэ компьютерийг
хараад л та ямар хүчирхэг, ямар хурдтай болохыг нь ойлгох болно. Гадаад байдал, кэйсний
загвар нь “Араатан” нэрэндээ тохирсон үнэхээр сүрдмээр гайхалтай бүтээл болжээ. Бас дээрээс нь сүүлийн үед дэлхийд гайхагдаад байгаа Интел корпорацийн гаргасан Core i7 CPU,
Интел x58 эх хавтан, хүч чадлаараа юуг ч дагуулахгүй GeForce GTX график карт зэргийг өөртөө багтаасан
нь ямар хүчирхэг болохыг нь харуулна. Одоогийн хамгийн өндөр хүч чадал
шаарддаг “Crysis”, “World of Conflict” зэрэг тоглоомыг хамгийн дээд зэргийн түвшинд, өндөр
нарийвчлалтайгаар тоглох бүрэн боломжтой.

Мультимедиа болон бизнесийн салбарт

Таны бизнест компьютер чухал нөлөө үзүүлдэг бол энэ компьютерт анхаарлаа хандуулаарай. Та Acer
Predator-ыг зөвхөн тоглоомчдод зориулсан компьютер байна гэж ойлгосон байж магадгүй. Бизнес
болон мултимедиа салбарт ч Predator-ыг мартаж болохгүй. Кэйс нь
Full-Size Tower буюу хамгийн том багтаамжтай бөгөөд дотроо
нэмэлт төхөөрөмж суурилуулах боломжтой хангалттай их зайтай. Үүний гол
давуу тал нь 4 хүртэлх тооны хатуу дискийг ашиглан RAID үүсгэх боломж юм.
RAID үүсгэх гэдгийг товчхоноор тайлбарлавал таны компьютер дэх хатуу дискүүдийг нэг
бол хурдыг нэмэх зорилгоор, аль эсвэл мэдээллийн аюулгүй байдал
буюу устах, алдахаас сэргийлж тус тусад нь биш, зэрэг ажиллуулна гэсэн үг юм. Таны
нэг хард хамаг чадлаараа л ажиллаад, нөгөө хард чинь сул байснаас илүү өгөөжтэй шүү дээ. Хэрвээ таны одоо ашиглаж байгаа компьютер чинь үргэлж
гацаж, шаардлагыг чинь хангахаа больсон бол та энэ компьюерийг худалдаж
аваарай. Таны бизнесийн үйл ажиллагааг Acer Predator илүү өндөр бүтээмжтэй, хурдтай, найдвартай байлгах болно.

Үндсэн үүрэг буюу тоглоомын хүчин чадал

Харин Acer Predator-ын үндсэн үүрэг болох тоглоомын хувьд Интелийн сүүлийн үеийн хүчирхэг Core
i7-940 CPU суулгаж өгснөөр нилээд хэмжээгээр чадалтай болгож байгаа юм. Та хэрэв энэ CPU-ны
тухай сайн мэдэхгүй бол Интел корпорацийн хамгийн сүүлийн гаргасан Core i7 CPU-ууд нь натив буюу жинхэнэ 4 цөмтэй
(бидний 4 цөмтэй гэж ойлгодог Core 2 Quad CPU нь яг үнэндээ жинхэнэ 4 цөмтэй CPU
биш юм) боловч “Hyper Threading” технологийн ачаар 8 үйлдлийг
зэрэг гүйцэтгэх чадвартай юм байна. Үүнээс гадна Core i7 нь өөрийн 1-2 цөмийг “Turbo Boost” горимоор автоматаар ажиллуулах чадвартай.
“Turbo Boost” нь хэрэв CPU-ны цөмүүдийн хэрэглэж байгаа гүйдэл, эрчим хүч болон температурын түвшин заагдсан хэмжээнээс бага байвал тэдгээр цөмүүдийг илүү хурдтай
ажиллуулдаг технологи юм.

Тоглоомонд хийсэн тестийн үр дүн

Компьютерээс маш их хүчин чадал шаарддаг 2 тоглоом дээр хийсэн 4 тестийн 3-ыг нь манай
“Араатан” өлхөн ажиллуулж дөнгөж байлаа. Crysis тоглоомыг хамгийн дээд зэргийн үзүүлэлт дээр
нь тохируулаад, дэлгэцийн нягтралыг 1280 х 1024 дээр тавихад 74 FPS (FPS
буюу Frames Per Second гэдгийг товчхоноор ойлговол 1 секундэд гүйх дүрсний тоо
юм), World in Conflict (WiC) тоглоомыг мөн хамгийн дээд үзүүлэлт дээр нь тохируулаад, дэлгэцийн нягтралыг 1280 х 1024 дээр тавиад
тестлэхэд 84 FPS, 1920 х 1200 дээр тавиад тестлэхэд 35 FPS үзүүлэлттэй
байна. Онолоор бол Crysis тоглоомыг 60-аас дээш, World in Conflict тоглоомыг
30-аас дээш FPS-тэй тоглоход хангалттай хэмжээ гэж үздэг.
“Араатан” зөвхөн Crysis тоглоомыг 1920 х 1200 дэлгэцийн нягтралтай үед тестлэхэд
17 FPS үзүүлж байна. Гэсэн хэдий ч Crysis-ыг 1920 х 1200 нягтралд ядахдаа 30 FPS үзүүлж чадах
компьютер авъя гэвэл танд хамгийн багадаа 5000$-ын үнэтэй 3
ширхэг график карт, бараг 2000$-ын үнэтэй оверклок(нэмэлт хөргүүр тусламжтайгаар хурдыг хүчээр ихэсгэсэн) хийсэн Интелийн хамгийн дээд зэргийн Core i7
Extreme Edition CPU шаардлагатай юм.

Мултимедиа тестийн үр дүн

Core i7 гэх энэ агуу CPU-ны тусламжтайгаар манай “Араатан”
бусад мултимедиа тестүүдийг зүгээр л зажлаад хаях чадвартай болжээ. Дэлхийн бараг бүх
компьютерийн хурд, хүчин чадлыг тестлэгчдийн хэрэгсэл болсон PCMark Vantage ба 3DMark
Vantage програмууд дээр гайхалтай амжилт үзүүлж байгаа юм. PCMark Vantage програмын тестнээс 6884 оноо авч байгаа
нь бусад оверклок хийгдээгүй компьютерүүдээс бараг хамгийн өндөр оноог авч байгаа юм. 3DMark Vantage програмын Entry хувилбарын
тестэнд 29475 оноо, Extreme хувилбарын тестэнд 4118 оноо авсан нь мөн зарагдаж
буй үнийнхээ түвшинд нилээд сайн үзүүлэлт болжээ.

Өрсөлдөгчид

Гялтганан харагдаж буй гадаад дэгжин үзэмж нь Аcer
Predator G7710-ыг жинхэнэ тоглоомчдод зориулсан гэдгийг ойлгуулж байна. Бүтээмж, хүч чадлаараа
“5000$-оос доош” ангиллын бусад тоглоомын дэсктоп системүүдийн хүчтэй өрсөлдөгч нь юм.
1500$ илүү үнээр зарагдаж байгаа Apple Mac Pro компьютертэй Windows орчинд
яг адилхан бүтээмж үзүүлж чадаж байгаа нь үнэхээр гайхалтай. Predator 3D график картаар илт давуу боловч аль аль
нь 4 цөмтэй CPU-тай юм байна. HP Firebird Voodoo DNA гэх 2100$-оор зарагдаж
буй компьютер нь Predator-ыг бас нэгэн өрсөлдөгч. HP-ийн энэхүү дэсктоп компьютер нь байгаль орчинд хор нөлөөгүй гэдгээрээ
Predator-оос илүү боловч кэйс доторх сул зай, бүтээмж, хурдаараа Predator яах аргагүй илүү юм.
“Араатны” хамгийн гол дайсан нь “Хямд”, “Gaming Editor’s Choice” гэх мэт
гуншинтай, 1250$-оор зарагдаж буй Gateway FX6800 юм.

Давуу тал

Хялбархан RAID үүсгэх боломжтой, бүтээмж, хүч чадалтай нь харьцуулахад үнэ нь харьцануй хямд, кэйс доторх нэмэлт эд анги суулгах сул зай,
шинэлэг технологиудыг нэгтгэсэн.

Сул тал

Дэгжин загвар нь зарим тохиолдолд зөвхөн
тоглоомчдод зориулж хийгдсэн, бизнес мултимедиа салбарт тохирохгүй мэт
харагдуулж болно. Мөн Бусад Acer-ийн компьютеруудын адилаар хэнд ч хэрэггүй Trial
програмууд дагалдаж ирдэг. Харин худалдан авагч нар юу ч суулгаагүй цэвэр үйлдлийн
системтэй нь худалдаж авахыг илүүд үздэг.

Дүгнэлт

Хэрвээ та тоглоомын жинхэнэ “Араатан” дэсктоп компьютер
худалдан авахаар хайж байгаа бол Acer Aspire Predator G7710-U7790A нь маш сайн
сонголт байж чадна. Энэ компьютер нь өнөөгийн бүхий л тоглоомыг төвөггүй ажиллуулж дөнгөнө. Зөвхөн тоглоом ч биш бусад мултимедиа бизнесийн салбар дахь хэрэглэгчдийн
хэрэглээнд ч бүрэн нийцнэ. Танд бүр илүү мэргэжлийн түвшний компьютер шаардлагатай байсан үед ч та зөвхөн энэ
компьютерийг худалдан авахад л хангалттай. Учир нь үүний кэйс доторх зай нь нэмэлт
эд анги суулгахад хангалттай.

Эх сурвалж: Kt.mn