“Монгол кино пикчерс”-ээс “Монгол тулгатны 100 эрхэм” нэвтрүүлэг хийх талаараа өнөөдөр “Монгол ньюс”-д мэдээлэл хийлээ. Монголын түүхийг өөрсдийн цаг үед бүтээж байсан 100 эрхэм хүний түүхээр энэхүү нэвтрүүлгийг хийхээр болжээ. Уг нэвтрүүлгийн зорилго нь ХХ, ХХI зуунд Монгол түмний сэтгэл зүрхэнд хоногшсон, эрхэм нэр алдрыг хүртсэн эрхмүүдийг урьж, гайхалтай түүхийг нь бичих гэж буйд оршжээ. Есдүгээр сарын 9-нд уг цувралын анхны нэвтрүүлэг цэнхэр дэлгэцээр цацагдсан. Сар бүр хоёр эрхмийг буюу хоёр нэвтрүүлгийг бэлдэн үзэгчдийн хүртээл болгохоор төлөвлөөд байгаа юм байна. Энэхүү нэвтрүүлгүүдийг “Hero” энтертайнментийн хамт олон хамтран гүйцэтгэж байгаа бөгөөд нэвтрүүлгийн ерөнхий найруулагчаар ОХУ-ын Төрийн шагналт, Буриад улсын Урлагийн гавьяат зүтгэлтэн Борхүү ажиллаж байгаа аж. Мөн туслах найруулагчаар Ж.Жамьяансүрэн, “Hero” энтертайнментийн найруулагч Б.Баатар нар ажиллаж байгаа юм.

Уг нэвтрүүлэг нь ашгийн төлөө бус, улс төр болоод бизнесийн санаа агуулаагүй бөгөөд зөвхөн Монголын түүхийг бичих гэж уран бүтээлчид хамтран ажиллажээ. Уран бүтээлийн багийнхан харахаасаа илүү хадгалагдах нэвтрүүлэг хийх ёстой хэмээн үзэж байгаа учраас энэхүү нэвтрүүлгээрээ 100 DVD хийгээд дараа нь ном хийхээр төлөвлөөд байгаа гэнэ.

Хэвлэлийн хуралд оролцсон Бавуугын Лхагвасүрэн гуай “Энэ нэвтрүүлгийн гол зорилго бол эгэл хүний тухай эгэл нэвтрүүлэг гэж хэлж болно. Яагаад эгэл гэж хэлж байгаа вэ гэвэл энэ үг нь хальтхан сонсоход дэндүү даруу юм шиг сонсогддог ч гэсэн эгэл юм орчлонг бүтээдэг. Энэхүү нэвтрүүлэгт бид элдвийн маяг, асуух асуухгүй асуултууд, улс төрийн каррьер, даврах хүслээ дамжуулах нэвтрүүлэг болгохыг хүсээгүй юм. Хамгийн жирийн, хамгийн их үйлийг бүтээсэн, Монгол хүний бахархал болсон хүмүүсийг бид нар оруулахыг хичээж байгаа. Сүүдэргүй хүн гэж байх биш. Гэхдээ бага шиг сүүдэртэй. Сүүдэртэйгээсээ гадна сүүдэрт дайрагдаагүй хүн байгаасай хэмээн хүсэж байгаа” хэмээн ярьсан юм.

Уг нэвтрүүлэгт оролцох эхний 20 гаруй хүнийг сонгон нэвтрүүлгээ бичиж байгаа бөгөөд дараа дараагийн хүмүүсийг хамт олон, ард түмний саналын дагуу сонгон шалгаруулж хийх гэнэ. Гэхдээ сонгууль мэт туйлшруулахгүй, салбар салбараас төлөөлөл болгон оруулна хэмээн уран бүтээлчид нь мэдээллээ.