Монголын үндэсний “Боловсол суваг” телевизийн үзэгчдэдээ барьж байгаа
ээлжит супер бэлэг болох “50 саяын уналт” шоу тун удахгүй цацагдах гэж
байна. Ойрын өдрүүдэд тус телевизээр “Та 50 сая төгрөгөөр юу хийх вэ?” нэртэй бяцхан сурвалжлага гарсан нь үзэгчдийн дунд гайхшрал, хүлээлтийг үүсгээд авсан юм. Ийм их шагналын санг оролцогчдод санал болгож байгаад эргэлзэх ч хүн нилээдгүй байна. Тэгвэл үнэхээр Монголд анх удаа хамгийн том шагналын сантай шоу нэвтрүүлгийг эхлүүлэхээр болж, оролцогчдыг бүртгэж эхэлсэн байна. Тиймээс одоо 10 мянгатын 500 боодол бүхий 50 сая төгрөг эзнээ хүлээж байна. Нэвтрүүлгийн дүрэм ёсоор оролцогчид хосоороо буюу хоёр хоёроороо нэг баг болж оролцох ба энэ нь эхнэр, нөхөр, ах дүүс, найз нөхөд гээд ямар ч хүмүүс байж болох юм. Нэвтрүүлгийн эхэнд телевизийн зүгээс 50 сая төгрөгийг оролцогчдод өгөх бөгөөд түүнийг зөв гэж бодсон хариултын хувилбар дээр тавина. Нийт 15 асуултад алдалгүй зөв хариултыг сонгож чадсан оролцогчид супер шагнал болох 50 сая төгрөгийн эзэн болно. Харин эсрэгээр нь буруу хариулт дээр мөнгийг байрлуулсан үед мөнгө доошоо унах ба таны гаргасан алдаа хэдхэн минутын дотор 50 сая төгрөгийг үгүй хийж мэдэх юм. Яг үүн дээрээс нэвтрүүлгийн нэрний тайлал гарч ирж байгааг та анзаарсан гэдэгт найдаж байна.

Сонирхуулахад, “TV Coctail” хамтлагийн жүжигчин Энхбаяр уг шоуг хөтлөх юм байна. Монголын шоу нэвтрүүлгийн ертөнцөд тэсрэлт болохуйц энэхүү нэвтрүүлгийг та ням гариг бүрийн үдэш Монголын үндэсний “Боловсол суваг” телевизээр үзээрэй.