МАН-аас зохион байгуулж буй “Ард түмнээ сонсъё” аян Завхан аймагт үргэлжилж байна. Аяны хүрээнд МАН-ын ерөнхий нарийн бичгийн дарга У.Хүрэлсүх болон тус аймгаас УИХ-д сонгогдсон түшээд Тосонцэнгэл сумын иргэдийн санаа бодлыг сонслоо.

Улсын хэмжээнд хоёрхон аймаг төвийн эрчим хүчний нэгдсэн сүлжээнд холбогдож чадаагүй байгаагийн нэг нь завханчууд. Эрчим хүчийг дагаж, үйлдвэр үйлчилгээ эрхлэхэд хүндрэлтэй байгаагийн зэрэгцээ ажлын байр шинээр бий болгох боломж хомс байна гэдгийг иргэд онцолж байна. Мөн иргэн бүрт олгох 1.5 сая төгрөгийг 70-аас  дээш насны ахмадуудад бэлнээр олгох боломж байгаа эсэхийг лавлалаа. Түүнчлэн 1995 оноос өмнө тэтгэврээ тогтоолгосон ахмадуудын хувьд тэтгэврийн зөрүүг арилгаж, 1995 оноос хойш тэтгэврээ тогтоолгосон иргэдийнхтэй ойртуулах боломж байгаа эсэхэд хариулт өгөхийг ч хүслээ.

Хүний хөгжлийн сангаас олгож байгаа хувь хишгийг бэлнээр иргэдэд шууд олгох нь инфляцийг хөөрөгдөж эдийн засгийг туйлдуулах эрсдэлтэй тул УИХ-аас тусгайлан хууль баталж, иргэн бүрт 2011 оны нэгдүгээр сарын 1-нээс эхэлж сар тутамд 21 мянган төгрөг олгосон. Ахмадуудын хувьд мөнгөө бэлнээр авах сонирхол их байгаа. Ингэхдээ тэтгэврийнхээ зээлийг дарах сонирхолтойгоо илэрхийлж байсан тул энэ чиглэлээр Засгийн газрын төвшинд судалгаа хийж буй. Харин 1995 оноос өмнө тэтгэврээ тогтоолгосон иргэд болон 1995 оноос хойш тэтгэвэрт гарсан хүмүүсийн тэтгэврийн зөрүүг ойртуулах хүрээнд УИХ-ын нэр бүхий гишүүд хуулийн төсөл санаачлан УИХ-д өргөн мэдүүлсэн. Төслийг хэлэлцэх шатанд тодорхой шийдвэр гарах болно гэсэн хариуг намын гишүүд өглөө.  Мөн аяны хүрээнд яригдсан бүх асуудлыг МАН-ын Удирдах зөвлөл дээр ярилцаж, Засгийн газарт асуудал болгон тавихаа ч амласан юм.