БЗД-ийн нутаг дэвсгэрт 20 настай охин Б-ийн амийг 16 настай Г, У нар хөнөөж, цогцсыг шатааж, жалганд хаясан онц ноцтой хэрэг өнгөрөгч зургадугаар сарын 16-нд  гарсан талаар бид мэдээлж байсан. Тус хэргийг УМБГ-ын онц хүнд, зохион  байгуулалттай гэмт хэрэг мөрдөх хэлтэст шалгаж байгаа. Эх сурвалжийн мэдээлснээр мөрдөн шалгах ажиллагаа дуусах шатандаа орсон бөгөөд энэ сард багтаан прокурорт шилжүүлэх юм байна.

Уг хэргийн талаар сануулахад, БЗД-ийн Гачууртад оршин суух 20 настай Б охиныг  тус дүүргийн харьяат 16 настай Г, У гэгч хоёр эрэгтэй машинаар нь хотоор зугаалахын тулд амь насыг нь хохироосон юм. Хэрэг 16-ны өдөр болсон ч талийгаачийн ар гэрийнхэн охиноо бусдын гарт амь үрэгдсэнийг дөрвөн өдрийн дараа буюу 20-ны өдөр мэдсэн байна. Уг хэргийг үйлдсэнээ анхны мэдүүлгээр хүлээсэн Г, У нараас гадна талийгаач охины машинд сууж яваад цагдаагийнханд саатуулагдсан 16 настай гурван хүүхэд байгаа юм. Тэдгээр гурван хүүхдийг Г, У нарыг гэмт хэрэг үйлдэх үед хамт байгаагүй, сүүлд уулзсан гэх үндэслэлээр  гадуур байцааж байгаа аж. Тэдэнд эрүүгийн хуулийн 91.2 дахь заалтыг үндэслэн эрүүгийн хэрэг үүсгэн шалгаж байгаа юм.