Нийгмийн шударга бус байдлын эсрэг Израилийн 460 мянга гаруй иргэд өчигдөр жагсаал хийсэн байна. Хамгийн олон хүнтэй жагсаал Тель-Авив хотноо болж, 300 мянган хүнийг хамарчээ. Харин Иерусалим хотод ерөнхий сайд Биньямин Нетаниягугийн өргөөний дэргэд 25 мянган хүн жагсав. Эсэргүүцлийн жагсаал Хайф, Беэр-Шеве зэрэг нийт 20 хотод өрнөжээ.

Жагсагчдыг гэртээ харихад нь зориулан төмөр замын нэмэлт рейс гаргасан байв. Эрх баригчид Дээд шүүхийн шийдвэрийн дагуу энэ арга хэмжээг авсан байна. Нийгмийн шударга бус байдлын эсрэг эсэргүүцэл Израильд долдугаар сараас эхлэн явагдаж байна. Жагсагчид амьжиргааны өртгийг бууруулахыг Засгийн газраас шаардаж байгаа юм. Эсэргүүцэл гаргагчдын шахалтаар ерөнхий сайд Биньямин Нетаниягу шинэчлэлийн төлөвлөгөө боловсруулах тусгай комиссийг байгуулжээ. Гэсэн ч жагсагчид үүнээс илүү дорвитой арга хэмжээ авахыг шаардаж байгаа юм.