Дэлхийн оюутны зуны 26 дугаар Универсиад их наадам 2011 оны 08 дугаар сарын 12-23-ны өдрүүдэд БНХАУ-ын Шинжинь хотноо амжилттай болж өндөрлөсөн билээ.  

Оюутан тамирчид  алт 306, мөнгө 302, хүрэл 360 медаль нийтдээ 968 медалийн төлөө өрсөлдсөнөөс 58 орны тамирчид медаль хүртсэн байгаа. Багийн албан ёсны дүнгээр БНХАУ-ын тамирчид 75 алт, 39 мөнгө, 31 хүрэл, нийт 145 медалиар тэргүүн байрт орсон бол  ОХУ-ын баг тамирчид 42 алт, 45 мөнгө, 45 хүрэл, нийт 132 медаль авч, хоёрдугаар байрт,  БНСУ-ын тамирчид 28 алт, 21 мөнгө, 30 хүрэл, нийт 79 медаль хүртсэн амжилтаар гуравдугаар байрт  тус тус  шалгарсан. Манай улс нийт 151 орноос медалийн тоогоороо 33-р байр эзэлсэн амжилтыг энэ удаагийн наадамд оролцохдоо үзүүлсэн.

Энэхүү наадамд Олон улсын оюутны спортын холбооны бүрэн эрхт гишүүн Монголын оюутны спортын холбооноос зохион байгуулан Монголын улсын оюутны шигшээ баг тамирчдыг спортын 12 төрөлд бүрэлдүүлэн, 2011 онд зохиогдсон Монголын оюутны спортын 10 дугаар их наадмын шигшээ тэмцээнүүдээс сонгон авч, 157 хүний бүрэлдэхүүнтэй тамирчдыг бэлтгэн оролцуулсан юм. Түүнчлэн ОУОХ-ны шугамаар ОУОСХ-ны ерөнхий санхүүч Д.Баясгалан, МОСХ-ны Ерөнхий нарийн бичгийн дарга Д.Жаргалсайхан нар томилолтоор ажиллаж, Монголын төлөөлөгчдийн ахлагчаар ЗГХАгентлаг БТСГазрын дарга Ч.Наранбаатар нар ажилласан бол  МОСХ-ны ажилтан, тамирчид, дасгалжуулагчид, дөрвөн шүүгч, Их, дээд сургуулийн найман багш  Монголын талыг төлөөлөн оролцжээ.

Өчигдөр буюу наймдугаар сарын 30-нд Универсиад наадамд амжилттай оролцсон жүдо бөхийн оюутан тамирчин, ОУХМастер О.Чинбат/Барилгын технологийн коллежи/, шатрын их мастер Б.Мөнгөнтуул, буудлагын урт бууны тамирчид болох Д.Ганзориг /ҮБДТС/, Н.Баяраа /ШУТИС/, ОУХМ Ч.Нарантуяа /МУБИС/ нарыг БТСГазрын дарга Ч.Нарантбаатар “Спортын алдар” медалиар, МОСХ-ны ЕНБД Д.Жаргалсайхан, Гүйцэтгэх захирал Ч.Эрдэнэтуяа нарыг “Алдан од”  медалиар тус тус шагналаа.

Мөн  МОСХ-ны Ерөнхий нарийн бичгийн дарга Д.Жаргалсайхан оюутан тамирчид, дасгалжуулагч багш нартаа мөнгөн шагнал, дурсгалын зүйлс гардуулан өгч, амжилт хүссэн юм. Буудлагын тамирчин Д.Бишрэл  АНУ-д тэмцээнд яваа тул өчигдөр хараахан ирж амжсангүй.

Оюутны наадамд амжилт үзүүлсэн мөнгөн медальтнуудаа 9 дүгээр сарын 1-ний өглөө Сүхбаатарын талбайд болох Эрдмийн баярын үеэр спортын амжилтыг нь үнэлэн  Засгийн газрын мөнгөн шагнал болох 5 000 000 төгрөгийг МУ-ын Ерөнхий сайд С.Батболд, БСШУ-ны сайд Ё.Отгонбаяр нараар гардуулан өгөх ажлыг зохион байгуулах юм байна.