УИХ Үндсэн хууль байтугай Сонгуулийн тухай хуулийг шинэчилж амжаагүй байхад Ц.Шинэбаяр тэргүүтэй “Хамуг Монгол”-ын улстөрчид амбицаа тун тодорхой илэрхийлсэн билээ. “Хамуг Монгол”-ын улс төрийн эрхэм чухал зорилт бол Монголын төрийн жинхэнэ эзэн болох монгол үндэстнийг орхигдуулсан өнөөгийн Үндсэн хуулийг халж, Хамуг Монголыг дээдэлсэн, “Монголын төр зөвхөн монгол хүний төлөө” гэсэн үзэл баримтлал бүхий Хамуг Монголын шинэ конституцийг батлах явдал мөн” гэж. Харин одоо тэд “Хамуг Монгол” эвслийнхээ дэргэд Хөдөлмөрийн нам байгуулахаар шийджээ. Тийм ээ, тэд Н.Энхбаярынхнаас түрүүлж хөдөлж байна. Учир нь экс Ерөнхийлөгчийн фракцийнхан МАХН хэмээх нэрийг хуулийн дагуу өмчилсөндөө тайвширч, намынхаа үзэл баримтлалыг тодотгоход нэг их яарахгүй байсан юм. Ардчилсан намын дарга Н.Алтанхуяг Ардын намынханд 90 жилийн ойн баярын мэндчилгээ дэвшүүлэхдээ “Би хамтарсан Засгийн газар хэмээх “өндөг”-өө хагалчихгүйг хичээж яваа шүү” гэсэнчлэн МАХН-ынхан эрх баригч хүчний нэрийн хуудас болж байсан дөрвөн үсгийг “манаж” байх зуур Ц.Шинэбаяр нар тэдэнтэй гуравдагч хүчний орон зайг булаацалдаж эхэллээ. Ингэснээр “Экс Ерөнхийлөгч МАНАН-ыг саринаах гуравдагч хүчний удирдагч болох нь тодорхой боллоо” хэмээн таамаглаж байсан ажиглагчид дуран авайгаа огт өөр тийш хандуулах хэрэгтэй болох нь. “Энэ ертөнц дээр хамгийн амархан тасалж болох зүйл бол түншлэлийн харилцаа” гэдэгчлэн Н.Энхбаяр, Ц.Шинэбаяр нарын түншлэлийг хэн үгүй хийчихэв гэдэг нь ч сонирхол татна.
УИХ-ын намрын чуулган тун удахгүй эхэлнэ. Тэр үеэр эрхэм гишүүн Ц.Шинэбаяр улстөрчдөд нэн сонирхолтой сюрприз барих нь бараг тодорхой болов. Гэвч чухам ямар сюрприз гээч. Тэрбээр чуулганы танхимд Монголын улс төрийн 20 дахь хүчин буюу Хөдөлмөрийн намын төлөөлөл болон орж ирнэ. Тиймээс гадаадад өндөр боловсрол эзэмшсэн багийнхан нь зүүн төвийн үзэл баримтлал бүхий намыг зохион байгуулах зөвлөлөө хэдийнэ байгуулжээ. “Хамуг Монгол” эвслийг үүсгэн байгуулагч Ц.Шинэбаяр МАХН-ын дэд даргын албан тушаалаас огцрохоо мэдэгдэх үедээ “Хувь тавилан нэгт “Хамуг Монгол”-ын ард түмэн хоёр замаар улс төр хийх учиртай. Нэгдүгээрт, “Хамуг Монгол”-оос томилолт авсан төлөөллийн байгууллагууд болох хууль тогтоох засаглал, гүйцэтгэх засаглал, шүүх засаглалаар дамжуулан улс төр хийх. Хоёрдугаарт, “Хамуг Монгол”-ын ард түмэн хэн нэгэн төлөөлөгчөөр дамжуулахгүйгээр улс төрийг өөрсдөө шууд хийх зам юм” гэсэн удаатай. Экс Ерөнхийлөгчтэй шадарлаж явахдаа “Их улс төрийг Төрийн ордонд биш, гудамжинд хийнэ” хэмээсэн тэрбээр УИХ-ын үйл ажиллагаанд дахин оролцох болсон нь ч ийм учиртай. Харин Хөдөлмөрийн намыг зохион байгуулах зөвлөлийнхөн нь “Хамуг Монголын Хөдөлмөрийн нам нь нэг ч монгол хүнийг ардчиллын гадна орхигдуулахгүйгээр хамтын ардчиллыг дээдэлж, нэг ч монгол хүнийг зах зээлийн гадна орхигдуулалгүйгээр хамтын зах зээлийн эдийн засгийг хөгжүүлнэ. Ард түмнийг мэдлэгийн нийгмийн шаардлага хангасан ажлын байр, орон сууцтай болгох зэрэг бодлогыг хэрэгжүүлнэ” хэмээж байна. Ардын нам, бас МАХН… Тийм ээ, эд цөм зүүн төвийн үзэл баримтлалтай. Элдэв амлалт, нийгмийн халамжаар эмблем хийдэг нь ч тэдний онцлог. Гэвч Ц.Шинэбаяр тэргүүтэй Хөдөлмөрийн намынхан зүүн төвийн үзэл баримтлал бүхий нам өөр ямар тоглолт хийж болдгийг олон нийтэд харуулахаар шийджээ. Хамгийн сонирхолтой нь “Эрх баригч луйварчдад найдах өчүүхэн ч зүйл алга” хэмээсэн тэднийг МАНАН нэгдэлд уусахгүй гэж найдъя. Ямартай ч Ц.Шинэбаяр нар гуравдагч хүчний орон зайг аравт, зуут, мянгатын армитайгаа эзлэхээр хөдөлсөн Н.Энхбаярын өмнө Хөдөлмөрийн нам хэмээгч нэгэн “цайз”-ыг босгож эхэллээ. Тэд энхбаяризмын эсрэг хөдлөх тактикаа яг одоо боловсруулж байна.
"Улс төрийн тойм" сонин