Баянзүрх дүүргийн Засаг даргын Тамгын газрын дарга Б.Амартүшинг ажлын байран дээрээ хутгалуулсан хэргийг Баянзүрх дүүрэг дэх цагдаагийн нэгдүгээр хэлтэст шалгаж байна. Энэ хэргийг 64 настай И үйлдсэн гэдгээ мэдүүлээд буй.

Цагдаагийн байгууллагаас авсан мэдээллээр И нь Баянзүрх дүүргийн харьяат бөгөөд 1954 онд төрсөн, эрхэлсэн тодорхой ажилгүй нэгэн аж.

Тэрбээр өчигдөр /2018.07.31/ Баянзүрх дүүргийн Засаг даргын Тамгын газрын нарийн бичиг эмэгтэйн өрөөнд орж ирээд, маргаан дэгдээж, биед нь халджээ. Улмаар энэ асуудлыг намжаах гэсэн ЗДТГ-ын дарга Б.Амартүвшинтэй маргалдаж, хэвлийд нь хутгалж гэмтээсэн гэдгээ мэдүүлсэн байна. Мөн гэмт хэрэгт холбогдогч этгээд “Миний хүргэн дүү дүүргийн хот тохижилтын газар ажилладаг. Би тагнуулч хүн учир биеэ хамгаалахаар хутга авч явдаг” зэргээр мэдүүлжээ.

Харин түүний дүү Б “Манай хамаатнуудаас дүүргийн Хот тохижилтын газар ажилладаг болон ажиллаж байсан хүн байхгүй. Манай ах хэд хоногийн өмнөөс өвчин нь хөдлөөд янз бүрийн юм ярьдаг нь эхэлсэн. Бас утга нь ойлгомжгүй юм бичээд байдаг юм. СЭМҮТ-д эмчийн хяналтад ороод олон жил болж байгаа” гэдэг тайлбар өгчээ.

Хэргийн газарт ажилласан цагдаагийнхан хэрэгт холбогдогч И-гийн авч явсан утга тодорхой бус үгстэй лоозон, сэтгүүл, “Би Монгол хүн, Трам” гэх мэт үгтэй цаас тогтоосон малгай зэргийг нь эд мөрийн баримтаар хураан авчээ.

Гэмт хэргийн холбогдогч И нь “Шизопрени” өвчний учир Сэтгэцийн эрүүл мэндийн үндэсний төвийн их эмчийн хяналтад байдаг, уг өвчний улмаас хөдөлмөрийн чадвар алдалттай этгээд аж.

Баянзүрх дүүргийн Засаг даргын Тамгын газрын дарга Б.Амартүвшин Цэргийн нэгдсэн госпиталд хэвтэн эмчилгээ хийлгэж байна.  

‘Б.ИДЭРЧУЛУУН ЖАГСААЛ ХИЙХ ХҮСЭЛТ ГАРГАЖ БАЙГААГҮЙ’

Нийслэлийн Баянзүрх дүүргийн Засаг даргын Тамгын газрын дарга Б.Амартүвшинг албан өрөөнд нь хутгалсан гэх иргэнийг Б.Идэрчулуун гэдэг бөгөөд жагсаал зохион байгуулах хүсэлт тавьсныг дүүрэг нь хүлээж аваагүйд дээрх хэргийг өдүүлсэн тухай дуулдаж байгаа. Энэ талаар бид Баянзүрх дүүргийн Засаг даргын Тамгын газрын Хэвлэлийн албнааас тодруулахад дараах тайлбар өглөө.

Б.Идэрчулуун анх угтах үйлчилгээний ажилтнаас дүүргийн Засаг даргыг асууж орж ирсэн байдаг.  Тухайн үед дүүргийн Засаг дарга хуралтай байсан тул Тамгын газрын даргын өрөөг зааж өгсөн. Улмаар сэжигтэн Б.Идэрчулуун дүүргийн Тамгын газрын Шагнал, төрийн албан хаагчийн ёс зүйн асуудал хариуцсан мэргэжилтэн Ц.Бадам-Очирыг үг хэлүүлэхгүй шууд цохисон. Энэ үед Тамгын газрын дарга Б.Амартүвшин зохих шаардлагыг тавихад түүнийг хутгалсан байна.

2018 он гарснаар иргэн Б.Идэрчулуунаас Баянзүрх дүүргийн Засаг дарга болон Засаг даргын Тамгын газарт жагсаал, цуглаан зохион байгуулах мөн уулзах ямар нэгэн өргөдөл, хүсэлт ирүүлээгүй байна. Мөн сэжигтэн Б.Идэрчулуун нь дүүргийн Тамгын газарт ирж хэлтэс, албадын дарга болон холбогдох мэргэжилтнүүдтэй өмнө нь огт уулзаж байгаагүйг дүүргийн Тамгын газрын албан хаагчид хэлж байгаа.

Биедээ ахуйн зориулалтын хутга авч яван, байн байн тэмтэрч үзэж байгаа бичлэг нь дүүргийн хяналтын камерт хадгалагдсан байна. Иймд түүнийг анхнаасаа ‘’Хүн хутгалах зорилго’’-той орж ирсэн гэж үзэж байгаа бөгөөд сэжигтэн И нь хутгалсан даруйдаа хутгаа хэрэг гарсан өрөөний цонхоор шидсэнийг дүүрэг дэх Цагдаагийн I хэлтсийн албан хаагчид илрүүлсэн.  Харин уг хэргийг санаатайгаар зохион байгуулж дүүргийн Тамгын газрын даргыг Засаг дарга гэж андууран ‘’Бай’’-гаа оноогүй халдлага хийсэн гэх хардлага төрж байгаа. Одоогийн байдлаар тус хэрэг мөрдөн байцаалтын шатандаа явж байгаа бөгөөд хохирогч Б.Амартүвшин Цэргийн төв эмнэлэгт хэвтэн эмчүүлж байна” гэлээ.

Э.АРИУН, Г.ХОРОЛ