МАН-ын Хяналтын хорооны дарга Д.Батбаатар өнөөдөр /2018.07.30/ мэдээлэл хийлээ. Тэрбээр намын гишүүдийн ёс зүй, хариуцлагатай байх дээр онцгой анхаарал хандуулна гэдгээ мэдэгдлээ.

МАН-ынхан үнэмлэхүй ялалт байгуулснаас хойш эрх мэдэл, сандал суудлын маргаан дэгдээж эхэлсэн. Дайран дээр давс гэгчээр Ерөнхийлөгчийн сонгуулийн үеэр “60 тэрбумын бичлэг” цацагдсан нь өнөөдөр ч яригдаж байна. Энэ сэдвийг эхлээд сөрөг хүчнийхэн улстөржүүлж байсан бол одоо МАН-ынхан өөрсдөө, тэр дундаа УИХ-ын гишүүн Л.Оюун-Эрдэнэ нар “ашиглаж” байгаа юм. Энэ мэт асуудлаас үүдэн УИХ дахь намын бүлэг, нийслэлийн намын хороо нь ч эв түнжин муутай байгаа аж. Тиймээс МАН-ын Хяналтын хороо гишүүдийнхээ ёс зүйн асуудалд онцгой анхаарал хандуулж ажиллахаа мэдэгдлээ. Ирэх пүрэв гаригт /2018.08.02/ МАН-ын Хяналтын хороо хуралдах тов зарлажээ.

Мөн намын гишүүдтэй холбоотой баримт нотолгоотой мэдээллийг аймаг, сум, дүүргийн намын үүрээр дамжуулан авахад бэлэн байна гэдгээ  Д.Батбаатар онцлов.

Т.НОМИН