IJF буюу ОУ-ын жүдо бөхийн холбооны календарт энэ сарын 27-29-ний өдрүүдэд Хорватын нийслэл Загреб хотноо “Загребийн Гранпри” тэмцээн зохиогдох хуваарьтай байгаа. Монгол  Улсаас Хорватыг МУГТ, 2014 оны дэлхийн аваргын алт, 2017 оны дэлхийн аваргын хүрэл медаль, Азийн наадмын мөнгө, ААШТ-ний алтан медальт, 2016 оны Бакугийн Их Дуулга, 2014 оны Парисын Их Дуулга тэмцээний аварга, 2017, 2013 оны Дюссельдорф, 2014. 2013 оны Улаанбаатар, 2010 оны Чиндаогийн Гранпри тэмцээнүүдийн аварга Г.Болдбаатар тэргүүтэй М.Тогтохбаяр, Д.Алтансүх, Б.Эрхэмбаяр, Г.Наранцэцэг нарын тамирчид оролцож байна.

Гавъяат тамирчин Г.Болдбаатар, М.Тогтохбаяр нар -66 кг-н жинд өрсөлдөх бол Д.Алтансүх, Б.Эрхэмбаяр нар -66 кг, Г.Наранцэцэг эмэгтэйчүүдийн -48 кг-н жинд өрсөлдөнө.

Эрэгтэй -60 кг-н жинд Риогийн олимпийн хүрэл, ДАШТ-ний хошой алт, 1 хүрэл медальт Японы Н.Такато, Олимп, Дэлхийн аваргын хүрэл, ААШТ-ний мөнгөн медальт Узбекстаны Д.Урозбоев нарын шилдгүүд байгаа бол -66 кг-н жинд 2017 оны дэлхийн аварга Японы Х.Абэ, дэлхийн аваргын хүрэл, энэ оны Европын аваргын хүрэлтэй Израилын Т.Фликер, Украйны шилдэг бөх, ДАШТ-ний алт, мөнгө, 3 хүрэлтэй Г.Зантариа, энэ оны Европын аваргын алтан медальт Словений А.Гомбоч, 2005 оны дэлхийн аваргын хүрэлтэй Азербайжаны Н.Шихализаде нарын шилдгүүд өрсөлдөнө.

Харин эмэгтэй -48 кг-д өрсөлдөх Г.Наранцэцэгийн жинд 2017 оны дэлхийн аварга Японы Ф.Тонаки, Европын аваргын алт, мөнгөн медальт Оросын И.Долгова, Казахстан улсын өмнөөс барилдаж буй Олимп, Дэлхийн аваргын хүрэл медальт Монгол охин Г.Отгонцэцэг нарын тэргүүтэй бөхчүүд өрсөлдөнө.  

Б.БЯМБАБАЯР