Италийн алдарт АС Милан клуб Бразилын шигшээ багийн довтлогч асан 48 настай Леонардог шинэ дасгалжуулагчаараа томиллоо. Леонардо тамирчин ахуйдаа 1997-2001 оны улиралд АС Милан клубт тоглохдоо 22 гоолыг өөрийн нэр дээрээ бүртгүүлж байсан бол сүүлд дасгалжуулагчийн карьераа 2009 онд мөн АС Милан клубээс эхлүүлж байсан. АС Милан клубыг цагтаа Италийн шигшээ багт тоглож байсан Ж.Гаттузо удирдаж байгаа. Тэрээр өнгөрсөн улиралд Сери-А лигтээ 6-р байранд орж Европа цомд өрсөлдөх эрхтэй болсон.

Английн Фулхэм клуб Герман Боруссиа Дортмунд клубын жигүүрийн довтлогч А.Шюррлег 2 жилийн хугацаатай зээлээр авлаа. А.Шюррле 2013-2015 онд Английн премьер лигийн Челси клубын төлөө тоглож байсан туршлагатай бөгөөд ийнхүү 2 дахь удаагаа Английн лигт ирж байна.

Бразилын хөлбөмбөгийн холбоо шигшээ багийн дасгалжуулагч Титегийн гэрээг 4 жилээр сунгалаа. Ингэснээр Тите 2022 он хүртэл Бразилын шигшээ багийг удирдах болж байна. Тите Бразилын шигшээ багийн дасгалжуулагчийн ажлыг 2016 оны зун 6 сард хүлээн авснаасаа хойш 26 тоглолт хийхдээ ердөө 2 хожигдсон. Энэ хоёр хожигдлын нэг нь ДАШТ-ний дунд шөвөгт Бельгийн шигшээ багт хожигдсон хожигдол юм.

Испаний Атлетико Мадрид клуб Португалын Спортинг клубээс 23 настай залуу довтлогч Г.Мартинсыг өөрийн болголоо. Атлетико Мадрид клуб шинэ тоглогчоо энэ долоо хоногийн сүүлээр албан ёсоор танилцуулах бөгөөд талууд 5 жилийн гэрээ байгуулсан байна.

Б.БЯМБАБАЯР