Авлигатай тэмцэх газраас /АТГ/ сар бүрийн 25-ны өдрийн уламжлалт хэвлэлийн хурлаа өнөөдөр/2018.07.25/ хийлээ. Хэвлэлийн хуралд тус газрын Тамгын хэлтсийн дарга, эрхэлсэн комиссар З.Баасанням, Мөрдөн шалгах хэлтсийн дарга, эрхэлсэн комиссар Э.Идэрцог, Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү, Хяналт шалгалт, дүн шинжилгээний хэлтсийн дарга , эрхэлсэн комиссар  Х.Хашбаатар нар  нар оролцлоо. Тэд долдугаар сард хийсэн  үйл ажиллагааныхаа   талаар мэдээлж, сэтгүүлчдийн асуултад хариулав.

Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү “Өнгөрсөн сарын хугацаанд иргэдээс  гэмт хэргийн шинжтэй 552 гомдол мэдээлэл хянан үзсэн нь өнгөрсөн оны мөн үетэй харьцуулахад 342-оор их буюу 2.6 дахин их үзүүлэлтэй байна. Хүлээн авсан 552 гомдол, мэдээллээс 287 гомдол мэдээлэлд хэрэг бүртгэлийн хэрэг нээх санал гаргасан.  209 гомдол, мэдээлэлд  хэрэг бүртгэлийн хэрэг нээхээс татгалзах санал гаргасан. 45 гомдол, мэдээллийг харьяаллын дагуу шилжүүлэх саналтайгаар прокурорт шилжүүлсэн. Одоо 31 гомдлын үлдэгдэлтэй байна” гэв.

Прокурорын байгууллагад хэрэг бүртгэлийн  шинээр нээсэн зарим хэргийн товч мэдээлэл:

• Монгол Улсын их сургуулийн эрх бүхий албан тушаалтан нар нь эрх мэдэл, албан тушаалын байдлаа урвуулан ашиглаж санхүүгийн дүрэм, журам зөрчиж цалин урамшуулал олгосон. Гадаад томилолт, сургалтын төлбөр зардлыг үндэслэлгүйгээр гаргаж өөртөө болон бусдад давуу  байдал олгосон.
• Боловсрол, соёл, шинжлэх ухаан, спортын яаманд ажиллаж байсан эрх бүхий  албан тушаалтан  нь ажиллах хугацаандаа тендер сонгон шалгаруулалтгүйгээр ажил гүйцэтгэх гэрээ байгуулж 43.6 сая төгрөгийг шилжүүлсэн. Мөн төсөвт  тусгагдаагүй зардал гарган 23.1 сая төгрөгийн тавилга эд хогшлыг худалдан авах дүрэм журмыг зөрчин шууд худалдаа хийж өөртөө  болон бусдад давуу байдал олгосон.
• Хууль Сахиулах их сургуулийн сургалт хариуцсан чанарын албаны эрх бүхий албан тушаалтан нь 2018-2019 оны хичээлийн жилийн бакалаврын элсэлтийн шалгалтын оноо  хүрээгүй элсэгчээс хахууль авсан гэмт хэрэгт  хэрэг бүртгэлийн хэрэг нээж мөрдөн шалгах ажиллагааг явуулж байна.

Эрүүгийн хэрэг үүсгэж, яллагдагчаар татах санал хүргүүлсэн зарим хэргийн товч мэдээлэл:

• Нийслэлийн хот төлөвлөлт,ерөнхий төлөвлөгөөний  газрын Барилга байгууламж хяналтын удирдах албан тушаалтан хот төлөвлөлтөд тусгагдаагүй  барилга байгууламжийн “Барилгын ажлын зөвшөөрлийн гэрчилгээ”-г гаргахдаа албаны чиг үүргээ хэрэгжүүлснийхээ хариуд хээл хахууль авсан.
• Ховд аймгийн Цэцэг сумын нутаг дэвсгэрт орших Мянган угалзат нурууны  тусгай хамгаалалтай байгалийн цогцолборт Цагаан-Эрэг нэртэй газарт нөхөн сэргээлтийн ажил хийх нэрийдлээр хууль бусаар алт олборлох, тээвэрлэх үйл ажиллагааг явуулахдаа орон нутгийн болон хууль хяналтын эрх бүхий албан тушаалтныг татан оролцуулсан зохион байгуулалттай гэмт бүлэглэлийн шинжтэй хэрэг.
• Орхон аймгийн Өмчийн харилцааны удирдах албан тушаалд ажиллаж байсан албан тушаалтан нь нийтийн албан тушаалд  ажиллах явцдаа өөрийн хөрөнгө, орлого их хэмжээгээр нэмэгдсэн нь хууль ёсны болохыг үндэслэлтэй тайлбарлаж чадаагүй. Улмаар албан тушаалаасаа огцорсны дараа онц их хэмжээний хөрөнгөөр орон сууцны зориулалттай барилга барьж, өөрийн нэр дээр үл хөдлөх эд хөрөнгө  өмчлөх улсын бүртгэлийн гэрчилгээ гаргуулан авсан. Хөрөнгийн эх үүсвэр нь  хууль ёсны болох нь тогтоогдохгүй байгаа үйлдэлд Эрүүгийн хэрэг үүсгэж , яллагдагчаар татах саналыг прокурорт хүргүүлсэн.

Шүүхэд шилжүүлэх саналтай санал хүргүүлсэн зарим хэргийн товч мэдээлэл:

• Нийслэлийн Нийтлэг үйлчилгээний газрын дарга Д.Одончимэг болон ерөнхий нягтлан бодогч Д.Энхжаргал нар нь албан тушаалын байдлаа урвуулан ашиглан үндэслэлгүй хөрөнгөжсөн. Тэд 2012-2017 онд өөрсдийн хамаарал бүхий есөн компаниар дамжуулан 1.5 тэрбум төгрөг завшсан.
• Дорнод аймгийн Хүнс, хөдөө, аж ахуйн газрын албан тушаалтнууд нь албан тушалын байдлаа урвуулан ашиглаж тус аймгийн Гурванзагал суманд хэрэгжүүлэхээр шийдвэрлэсэн “Мах сүү, сүүний чиглэлийн  үржлийн хээлтэгч , хээлтүүлэгч олгох” төслийг сонгон шалгаруулалтгүйгээр тус сумын засаг дарга Ч.Батдэлгэр , аймгийн ИТХ-ын төлөөлөгч Ч.Дамдинсүрэн  нарын төрсөн дүү  ах дүү нар болох Ч.Дамдиндорж,Ч.Батчадраа нарт давуу байдал бий болгосон.
• Улсын дээд  шүүхээс  нэмэлт мөрдөн байцаалтад буцаж ирүүлсэн Г.Дэнзэн нь  Монгол Улсын тэргүүн  шадар сайдын ахлах зөвлөхөөр ажиллаж байхдаа  Замын-Үүдийн эдийн засгийн чөлөөт бүсийн хил, гаалийн шалган нэвтрүүлэх боомтод автотээврийн хэрэгслийг жинлэх 150 тонны даацтай хэмжилтийн пүүг худалдан авах сонгон шалгаруулах үнэлгээний хорооны ажлын хэсгийн даргаар томилогдож албан тушаалын эрх мэдлээ урвуулан ашигласан хэргийг шүүхэд шилжүүлэх саналыг прокурорт дахин шилжүүлээд байна.

Э.Бурам