Монголын ногоон намынхан /МНН/ өнөөдөр Эрүүл мэндийн яамны Мэдээллийн төвд их хурлаа хийж байна. Тус намын дарга асан Д.Энхбат намаасаа өрх тусгаарлаж, МНН-ыг Иргэний  Зориг намтай нэгтгэн, ИЗНН-ыг байгуулсан бол  зарим гишүүд нь хуучин МНН-ынхаа  дүрмийг шинэчлэн баталж, Улсын дээд шүүхэд бүртгүүлнэ хэмээж буй.

Тэд “Монголын ногоон нам”-ын гэх тодотголтой их хурлаараа ёс зүйн алдаа гаргасан тус намын дарга асан Д.Энхбат, Э.Зоригт нарын асуудлыг хэлэлцэхээс гадна намынхаа бүтэц  зохион байгуулалтыг хэлэлцэж байгаа аж. Мөн шинэ  удирдлагаа сонгоно гэдгийг намын зарим гишүүд хэллээ. Одоогийн байдлаар намын даргад дөрвөн хүн нэр дэвшээд байгаа аж. Харин тус намын Ерөнхий нарийн бичгийн дарга О.Бум-Ялагч өнөөдөр албан тушаалаасаа татгалзаж буйгаа мэдэгдсэн бөгөөд намын даргад ч нэрээ дэвшүүлээгүй байна. Монголын ногоон намын их хуралд 100 гаруй гишүүд оролцож байгаа аж.