Голден ретривер нохой бол дэлхийн хамгийн ухаантай, оюуны чадамжаараа дэлхийд дөрөвт жагсдаг, эзэндээ маш их хайрыг мэдрүүлдэг гэдгээрээ алдартай. Тэгвэл анх Шотландад 1868 онд Golden Retriever-ийн анхны удамшлыг гаргаж авсныг бүртгэсэн байна. Энэ жил удамшлын 150 жилийн ой тохиож байгаа бөгөөд төрөлх Шотландын Томич хотын Гуйсачан эдлэнд нийт 360 гаруй голден ретривер үүлдрийн нохойг нэгэн дор цуглуулжээ.

Энэхүү үйл ажиллагааг Шотландын голден ретривер нохойны клубын хамт олон зохион байгуулсан байна. Сонирхолтой нь нохдын нэг нь ч хуцахгүй нам гүм чимээгүй байсан хэмээн тус клубын захирал Дорен МакГаган дурджээ. Зүгээр ч нэг цугларалт байсангүй энэ үеэр хамгийн шилдэг үүлдрийн голденг ч мөн шалгаруулсан аж.