Малдаа явсан 11 настай хүү сураггүй алга болжээ

Онцгой байдлын алба хаагчид сураггүй болсон гурван иргэнийг эрэн хайж байна. Тодруулбал,  өчигдөр /2018.07.16/ 21 цагийн орчимд Өмнөговь аймгийн Цогтцэций сумын Гашуун ус гэдэг газар 11 настай хүү малдаа яваад сураггүй алга болсон байна. Тус аймгийн Онцгой байдлын газар хүүг эрэн хайх ажиллагааг өнөөдөр /2018.07.17/ эхлүүлжээ.

Сэлэнгэ голын усанд 25 настай эрэгтэй осолджээ

Булган аймгийн Хутаг-Өндөр сумын Хутаг багийн Гуртын гүүр гэдэг газар  Сэлэнгэ голын усанд Орхон аймгийн Баян-Өндөр сумын харьяат иргэн 25 настай, эрэгтэй Б осолджээ. Дуудлага мэдээлэл онцгой байдлын албанд энэ сарын 11-нд ирсэн бөгөөд түүнээс хойш зургаа хоног хайсан ч одоогоор олоогүй байгаа аж.

согтууруулах ундаа хэрэглэсэн үедээ живсэн байж болзошгүй

Төв аймгийн Мөнгөнморьт сумын Байдлаг багийн Их гутай гэдэг газар энэ сарын 13-ны өдөр  Хэрлэн голын усанд нийслэлийн Багануур дүүргийн харьяат, 57 настай, эрэгтэй Ж живсэн байж болзошгүй тухай дуудлага иржээ. Түүнийг  согтууруулах ундаа хэрэглэсэн үедээ живсэн байж болзошгүй гэж албаны хүмүүс  үзэж байгаа юм байна. Эрэн хайх ажиллагаа үргэлжилж буй ч одоог хүртэл олдоогүй байна.

Э.Бурам