Хүннүчүүд болон Монголын тулгар төрийн түүх шастир, өв соёлыг судалж, сэргээх зорилгоор эрдэмтэн судлаачид, иргэд, байгууллагаас гаргаж буй санаачлагыг дэмжиж Монгол Улсын Ерөнхийлөгч  Монголын тулгар төрийн 2220 жилийн ойг 2011 онд төр ёсны их баяр болгон тэмдэглэх зарлиг гаргасан юм. Зарлигийн дагуу энэ онд Хүннүгийн өв соёлыг олон нийтэд сурталчлан таниулсан судалгаа,  эрдэм шинжилгээ, соёл урлагийг хамарсан олон үйл ажиллагаа зохион байгуулж байгаагийн нэг нь өчигдөр нээлтийг нь хийсэн “Хүннүгийн өв соёл” үзэсгэлэн боллоо. Монголын Үндэсний түүхийн музей, Шинжлэх ухааны академийн Археологийн хүрээлэн, Ой тэмдэглэх үндэсний хороо хамтран зохион байгуулж буй дээрх үзэсгэлэн ирэх арванхоёрдугаар сарын 31-н хүртэл үзэгчдийн хүртээл болно. Үзэсгэлэнд Хүннү гүрний түүх, соёл, гадаад харилцаанд холбогдох эд өлгийн зүйл, хот суурин, хадны (сүг) зураг, монгол нутагт тархсан булш бунханы малтлагаар гарсан 300 гаруй ховор сонин олдвор, хэрэглэгдэхүүнийг  дэлгэн тавиад байгаа юм.

Түүх сөхвөл, нүүдэлчдийн анхны төрт улс Хүннү гүрнийг нийтийн тооллын өмнөх (НТӨ) 209 онд Модун Шаньюй Төв Азийн нүүдэлчин аймгуудыг нэгтгэн байгуулсан гэдэг. Тухайн цагт Хүннү гүрэн дорно зүгт манжуурын талаас өрнө зүгт Тэнгэр уул, өмнө тийш Цагаан хэрмээс умард зүг Байгаль нуур хүрсэн өргөн уудам нутагт оршин байсан 36 их бага,  улсыг нэгтгэн захирч байсан аж. Тиймээс Хүннүчүүд өмнөд хөрш хятадын Хань улсаар өөрсдийгөө эн зэрэгцэх их гүрэн хэмээн хүлээн зөвшөөрүүлж, дундад азийн хот улсуудаас татвар авч байснаас гадна Ром, Египет, Грек-Бактри зэрэг тэр цагийнхаа өндөр соёл иргэншилт хүчирхэг улс үндэстнүүдтэй өргөн харилцаж Өрнө Дорныг холбох гүүр нь болж байжээ.  Үзэсгэлэнгийн нээлтэд Монгол Улсын Ерөнхийлөгчийн Эрүүл мэнд, боловсрол, шинжлэх ухаан, технологийн бодлого, шашны асуудал хариуцсан зөвлөх Р.Болд, Боловсрол соёл шинжлэх ухааны сайд Ё.Отгонбаяр, Монголын Үндэсний түүхийн музейн захирал Ж.Саруулбуян, Шинжлэх ухааны академийн ерөнхийлөгч Б.Энхтүвшин болон бусад албаны хүмүүс, эрдэмтэн судлаачид оролцлоо.