Үндэсний эрх чөлөөний хувьсгалын 100 жил, Монгол Улсын орчин үеийн дипломат албаны 100 жилийн ойд зориулсан Дэлхийн монголчуудын чуулганы баярын хуралдаан наймдугаар сарын 25-нд Гадаад харилцааны яамны “Зөвшилцөл” танхимд болов. Тус хуралдааныг Дэлхийн монголчуудын чуулганы ерөнхийлөгч, Онц бөгөөд Бүрэн эрхт Элчин сайд Ц.Гомбосүрэн нээсний дараа Монгол Улсын Ерөнхийлөгч Ц.Элбэгдорж дэлгэрэнгүй үг хэлж, дэлхийд тархан суурьшсан монгол туургатны эв эеийн үйлс хөгжин дэлгэрэхийг ерөөв. Монголчуудын бүтээсэн морин хуур, уртын дуу, хөөмий, биелгээ, эрийн гурван наадам, ном судар зэрэг соёлын олон өвийг ЮНЕСКО бүртгэл, хамгаалалтдаа авсныг Ерөнхийлөгч дурьдаад цаашид тэдгээрийг сурж, эзэмших, жинхэнэ эзэд нь байх үүрэг, хариуцлага тулгарч байгааг  сануулав.

Монгол Улсын Гадаад харилцааны сайд, Дэлхийн монголчуудын чуулганы зохион байгуулах хорооны дарга Г.Занданшатар хэлсэн үгэндээ бусад улс дахь монгол туургатнуудтай харилцаа, хамтын ажиллагаагаа өргөжүүлж, хэл, соёл, уламжлалаа хадгалан хөгжүүлэхэд нь дэмжлэг үзүүлэх явдал Монгол Улсын гадаад бодлогын нэг чухал зорилт болохыг онцлон тэмдэглэв. Мөн тэрбээр монгол туульсыг хүүхэд, залууст заан сургаж, өвлөн эзэмшүүлэх ажлыг өрнүүлэх санал дэвшүүлэв. Тус чуулганд гадаадын 25 оронд оршин суугаа монгол туургатны олон төлөөлөгч, зочид хүрэлцэн ирсэн бөгөөд тэднийг төлөөлж Дэлхийн шатрын холбооны ерөнхийлөгч, ОХУ-ын Халимаг Улсын ерөнхийлөгч асан К.Н.Илюмжинов үг хэлэхдээ монгол туургатан бизнес эрхлэгчид уугуул нутаг- Монгол Улсын хөгжил дэвшилд хувь нэмрээ оруулахыг уриалаад өөрийн зүгээс тодорхой төсөлд 100 сая долларын хөрөнгө оруулахад бэлэн байгаагаа илэрхийлэв.

Дэлхийн монголчуудын чуулганы үеэр эрдэм шинжилгээний хурал, гэрэл зургийн болон уран зургийн үзэсгэлэн, үндэсний спортын тэмцээн, үндэсний хувцасны үзүүлбэр, концерт, үдэшлэг зэрэг олон арга хэмжээ зохиогдох ажээ.