Улсын баяр наадамтай зэрэгцэн хөлбөмбөгийн ДАШТ-ний хагас шигшээ тоглолтууд явагдаж байна. Өнгөрсөн шөнө болсон хагас шигшээгийн эхний тоглолтонд Францын шигшээ баг Бельгийг хожиж 3 дахь удаагаа дэлхийн аваргын шувтрагын шатанд шалгарсан. Тэгвэл өнөө шөнө 02.00 цагаас Москва хотын “Лужники” цэнгэлдэх хүрээлэнд хагас шигшээгийн ээлжит тоглолт болох Хорват, Английн тоглолт болно.

Хорватын шигшээ баг дэлхийн аваргын D хэсэгт Аргентин, Нигери, Исландын шигшээ багуудтай өрсөлдөн хэсгээ тэргүүлж шөвгийн 16-д шалгарсан. Ийнхүү Хорватын шигшээ баг хасагдах шатанд Дани, Оросын шигшээ багуудыг хожиж түүхэндээ 2 дахь удаагаа хагас шигшээд шалгарсан. Хэдийгээр талбайн төвдөө Л.Модрич, И.Ракитич нарын шилдэг хагасуудынхаа шилдэг тоглолтоор хагас шигшээд шалгараад байгаа ч бас ч дорвитой хүчтэй өрсөлдөгчтэй тоглоогүй. Аргентины шигшээ баг энэ дэлхийн аваргад хангалттай бэлтгэлгүй байсан учраас Хорватад ялагдсан. Иймд Хорватууд магадгүй одоо л чансаагаа харуулах тоглолтыг Английн шигшээ багтай хийх гэж байна.

Английн шигшээ баг G хэсэгт Бельги, Тунис, Панамтай өрсөлдөн хүснэгтийн дэд байранд шалгарч шөвгийн 16-д шалгарсан. Шөвгийн 16-д Колумбыг 11 метрийн цохилтоор буулгаж авсан бол тал таардаггүй Шведийн шигшээг 2-0 харьцаатай хожиж хагас шигшээд шалгараад байна. Ийнхүү хөлбөмбөгийн эх орон гэгддэг Английн шигшээ баг 3 дахь удаагаа хагас шигшээд шалгарлаа. Шинэ систем, шинэ тактикаар гайхалтай шинэчлэлийг Английн хөлбөмбөгийн шигшээ багт авчирсан Г.Саутгейт энэ удаа залуусаа удирдан медалийн төлөөх хариуцлагатай тоглолтын өмнө ирээд байна.

Хоёр баг өмнө нь нийтдээ 7 удаа таарч тоглосон байдаг. Энэ 7 тоглолтоос Английн шигшээ баг 4 удаад нь хожиж, Хорватын шигшээ баг 2 удаа хожсон бол 2 удаа тэнцэж байжээ.

Таамаглаж буй гарааны бүрэлдэхүүн:

• Хорват: Д.Субашич, С.Врсалько, Д.Ловрен, Д.Вида, И.Стринич, И.Ракитич, М.Брозович, А.Ребич, Л.Модрич, И.Перишич, М.Манжукич

• Англи: Ж.Пикфорд, К.Уокер, Ж.Стонус, Х.Магуайр, К.Триппер, Д.Алли, Ж.Хендерсон, Ж.Лингард, Э.Янг, Р.Стерлинг, Х.Кейн

Өнөөдрийн тоглолтын өмнө Английн шигшээ багийн хагас хамгаалалтын гол тэнцвэржүүлэгч Ж.Хендерсон шөрмөсний бага зэрэг зовиуртай байгаа гэсэн мэдээлэл гарсан ч тоглолтонд оролцох боломжтой байгаа ажээ. Одоогоор хоёр багаас ямар нэгэн гэмтэл бэртлийн мэдээлэл гараагүй байна. Иймд хоёр баг өнөө шөнийн тоглолтонд бүрэн бүрэлдэхүүнээрээ оролцоход бэлэн болсон.

Б.БЯМБАБАЯР