Хятадын засгийн газар интернэтийн сүлжээг маш хатуу хяналтан дор байлгаж, нийгэмд зохимжгүй, нийцэмжгүй, аюултай гэж үзсэн бүхнээ үргэлж хааж боож, хусч арилгаж байдаг нь бичигдээгүй хууль болоод байгаа. Тиймдээ ч Хятадын соёлын яамнаас 100 дуу, хөгжмийг интернэтийн хар дансанд бүртгэж, иргэдийг үзэж, сонсохыг хориглосон бөгөөд уг жагсаалтанд Лейди Гага, Бейонси, “Take That” нарын хамтлаг, дуучдын хит дуунууд толгой цохиж явна.

Хятадын Соёлын яамнаас үндэсний соёлын аюулгүй байдалд аюул занал учруулж болзошгүй гэж тооцогдсон тэдгээр 100 дууг есдүгээр сарын 15 хүртэл вебсайтуудаар нэвтрүүлэхийг хоригложээ. Харин дээрх 100 дууг Соёлын яамны зүгээс албан ёсны зөвшөөрөлгүй хэмээн тайлбарлаж, ард иргэдээ “сэнхрүүлсэн” байна. Нэвтрүүлэхийг хориглосон дуунууд дотор Лейди Гагагийн дуунуудаас “The Edge of Glory”, “Hair”, “Marry the Night”, “Americano”, “Judas”, “Bloody Mary” зэрэг дуунууд багтсан бол Бейонсигийн дуунаас “Run the World” сингл багтжээ.