ОХУ-д болж буй хөлбөмбөгийн дэлхийн аварга шалгаруулах тэмцээнд Бразилын шигшээ баг Мексикийг хожин шөвгийн наймд үлдээд байгаа. Өчигдөр Самара хотын “Космос Арена” цэнгэлдэх хүрээлэнд болсон тоглолт 2:0-оор дэлхийн таван удаагийн аварга бразилчуудын ялалтаар өндөрлөсөн юм.

Тоглолтын үеэр Бразилын супер од Неймар нэг гоол хийсэн ч түүнийг хэд хэдэн удаа зохиомлоор унан баашилсан хэмээн олон улсын хэвлэл бичиж эхэллээ. Зарим спортын сувгууд энэ талаар нэвтрүүлэг хийгээд эхэлжээ. Мөн Неймарын энэ үйлдлийг залуу үеийнхэнд сөрөг үлгэр дууриалал үзүүлж байна гэж сошиалд иргэд саналаа илэрхийлсээр байна.   

Дэлхийн хамгийн үнэтэй тоглогч Неймарын ур чадварт эргэлзэхгүй байгаа ч Роналдо, Месси ингэж байсан уу хэмээн түүний үйлдлийг шүүмжилсээр байна.

Шөвгийн наймд үлдээд байгаа Бразилын шигшээ баг Белгитэй долдугаар сарын 7-ны шөнийн 02.00 цагаас тоглох хуваарьтай.

Ч.БОЛОР