Энэ оны долдугаар сарын 1-нээс хүүхэд тээвэрлэх сургуулийн автобусны насжилтад хязгаар тавьсан журам ОХУ-д үйлчилж эхэллээ. Шинэ журмаар сургуулийн автобусны насжилт нь 10 жилээс хэтэрсэн бол хүүхэд зөөвөрлөх шаардлагад нийцэхгүй болж байгаа юм. Шинэ журам эхний ээлжинд Москва, Санкт-Петербург хот болон  Москва болон Ленинград мужид хэрэгжинэ.

Сургуулийн автобусанд тавигдах шаардлага бүх орон даяар мөрдөгдөх боловч хэрэгжилтийг үе шаттайгаар хийхээр Засгийн газраас төлөвлөжээ. 2019 оны дөрөвдүгээр сарын 1-нээс бусад мужид дээрх шаардлага мөрдөгдөж эхэлнэ.

Энэ журмын хэрэгжилтэд давхар Замын цагдаагийн алба хяналт тавина. Замын цагдаагийн газрын санд бүртгэгдсэн тээврийн хэрэгслийн бүртгэлээр автобуснуудын насжилтыг давхар хянах ажээ. Энэ санд 22 мянга илүү сургуулийн автобус бүртгэлтэй байдаг байна.

2017 оны дүнгээр 16 хүртэлх насны хүүхэд зам тээврийн осолд өртсөн хэрэг нийт замын хөдөлгөөний ослын нэг хувь орчим буюу 9000 орчим бүртгэгджээ.

Эх сурвалж: РИА НОВОСТИ