ОХУ-д болж буй хөлбөмбөгийн дэлхийн аварга шалгаруулах тэмцээний шөвгийн 16-н тоглолтууд үргэлжлэн явагдаж байна. Өнөөдөр болох тоглолтын хуваарийг хүргэе.

БРАЗИЛ – МЕКСИК

Дэлхийн аварга цолыг хамгийн олон удаа буюу таван удаа хүртээд байгаа Бразилын шигшээ баг Серб, Швейцарь, Коста-Рикагийн багуудтай “E” хэсэгт багтсан. Хэсэгтээ хоёр хожиж, нэг тэнцсэн бразилчууд хасагдах шатанд Мексиктэй таарсан юм.

26 настай довтлогч Неймар бол Бразилын шигшээ баг төдийгүй дэлхийн шилдэг тоглогч билээ. Л.Месси, К.Роналдо нарын шилдэг хөлбөмбөгчид гэртээ харьсан энэ үед Неймараас их зүйлийг хүлээж байна. 

Дэлхийн хамгийн өндөр үнэтэй хөлбөмбөгчин хэмээх хэргэмийг эзэмшигч Неймар дөрвөн жилийн өмнө нутагтаа болсон дэлхийн аваргад бэртэл авч тэмцээнийг дундаас нь орхиж байсан. Тэгвэл энэ удаа нутагтаа хүрч чадаагүй амжилтаа үзүүлж, мөрөөдлөө биелүүлэхээр Орост ирээд байна. Неймар одоогоор нэг гоолыг хийгээд байгаа.

Дэлхийн таван удаагийн аварга Бразилын шигшээ багт хүртэж үзээгүй алтан медаль, цом гэж байхгүй. Дэлхийн аварга, тив хоорондын цом, тивийн аварга болон олимпийн аваргын алтан медалийг бүгдийг нь хүртсэн. Харин энэ удаа зургаа дахь түрүүгээ хүртэх зорилготой байгаа нь дамжиггүй.

МЕКСИК

Энэ дэлхийн аваргад аваргаа хамгаална хэмээн Германы шигшээ багийг онцолж байсан. Тэгвэл хэсгийн тоглолтод тааруухан амжилтыг үзүүлж, хасагдах шатанд шалгарч чадаагүй германчуудын оронд Мексик шөвгийн 16-д үлдсэн юм. Эхний тоглолтод Германыг 1:0-оор хожсон Мексикийн шигшээ баг БНСУ-ыг хожин хэсгээсээ гарахаа баталгаажуулсан. Хэдийгээр сүүлийн тоглолтод Шведэд хожигдсон ч мексикчууд хоёрдугаар байраар шалгарсан. 

Мексикийн шигшээ баг бол ямар ч багийн хувьд хүчтэй өрсөлдөгч байж чаддаг. Үүнийг батлах нэг үзүүлэлт бол 1994 оны ДАШТ-ээс хойш зургаан дэлхийн аваргад шөвгийн 16-д шалгарсан амжилт харуулна. Мөн хоёр удаа шөвгийн наймд үлдэж байсан Мексикийн шигшээ баг энэ удаа Бразилтай тоглохоор боллоо. 

Бразил, Мексикийн тоглолт Улаанбаатарын цагаар 22.00-с Самара хотын “Космос Арена” цэнгэлдэх хүрээлэнд болно.

БЕЛГИ

Белгийн шигшээ баг Англи, Тунис, Панама улсын шигшээ багуудтай “G” хэсэгт багтсан. Хэсгээ гурван хожилтойгоор тэргүүлсэн Белгийн шигшээ баг хасагдах шатанд Ази тивийн төлөөлөл болсон Японтой таараад байна.

Бельгийн шигшээ багийн дэлхийн аваргад үзүүлсэн хамгийн өндөр амжилт бол 1986 оны Мексикт болсон ДАШТ-ий хагас шигшээд шалгарсан амжилт юм. 2014 онд Бразилд болсон 20 дахь удаагийн ДАШТ-ий шөвгийн наймд  Аргентины шигшээ багт  хожигдож (1-0) байсан.

ЯПОН

Сенегал, Польш, Колумбтай “H” хэсэгт багтсан Японы шигшээ багийг энэ хэсгээс гарна гэж тооцоолол бага байсан. Эхний тоглолтод Колумбыг 1:0-оор хожсон япончууд Сенегалтай тэнцээ хийснээр хэсгийн хоёрдугаар байраар шалгарсан. Сүүлийн тоглолтод Польшид хожигдсон ч Японы шигшээ багт хасагдах шатанд шалгарах боломж гарсан юм.

Японы шигшээ баг 1998 оноос хойш Азийн бүсээс тогтмол дэлхийн аваргад оролцож байгаа бөгөөд 2002, 2010 онуудад шөвгийн 16-д шалгарч байсан.

Белги, Японы тоглолт маргааш өглөө 02.00 цагаас Дон мөрний эрэгт орших Донын Ростов хотын “Ростов Арена” цэнгэлдэх хүрээлэнд болно.

Ч.БОЛОР