ОХУ-д болж буй хөлбөмбөгийн дэлхийн аварга шалгаруулах тэмцээний шөвгийн 16-н тоглолт өнгөрсөн шөнө болж, цааш өрсөлдөх багууд тодорч эхэллээ. Өнгөрсөн шөнө Франц, Уругвай цааш тоглох эрхээ авсан бол Португал, Аргентин нутаг буцаж байна. Харин өнөөдөр Испани, ОХУ болон Хорват, Данийн багууд тоглоно.

ИСПАНИ  – ОХУ

“А” хэсгийн хоёрдугаар байраар шалгарсан ОХУ, “В” хэсгийг тэргүүлсэн 2010 оны дэлхийн аварга Испаний шигшээ багуудын тоглолт 22.00 цагаас Москва хотын “Лужник” цэнгэлдэх хүрээлэнд болно. ОХУ-ын шигшээ баг нээлтийн тоглолтод Саудын Арабыг 5:0-оор хожиж, нэгэн амжилтыг тогтоосон билээ. Улмаар Египетийг 3:1-ээр хожиж, хэсгийн хоёрдугаар байраар шалгарсан. Дэлхийн аваргын өмнөх үзүүлэлтээр хамгийн муу багаар нэрлэгдэж байсан 21 дэх удаагийн ДАШТ-ийг зохион байгуулагч Оросын шигшээ баг хэсгээсээ төвөггүйхэн гарсан. Өнөө шөнө дэлхийн аварга Испанийн шигшээ багтай тоглоно.

ОХУ тэмцээнийг зохион байгуулагч орны статусаар шууд эрхээ авсан бөгөөд шөвгийн 16-д үлдсэн нь хамгийн том амжилт болоод байна. Хэсэгтээ үзүүлсэн амжилтыг одоо харж байгаа. Гэхдээ тэдний өрсөлдөгч бол Испани юм. Найман жилийн өмнө дэлхийн аварга цолыг анх удаа хүртэж байсан Испаний шигшээ баг энэ удаа Португал, Иран, Мароккотой нэг хэсэгт багтсан. Хэсгийн эхний тоглолтод Португалтай 3:3-аар тэнцсэн испаничууд хэсгээ сүүлийн тоглолтод Мароккотой тэнцээ хийсэн. Португал мөн Ирантай тэнцээ хийснээр испаничууд хэсгээ тэргүүлсэн.

ХОРВАТ – ДАНИ

“D” хэсгийг тэргүүлсэн Хорват, “C” хэсгийн хоёрдугаар байраар шалгарсан Данийн шигшээ багийн тоглолт шөнийн 02.00 цагаас хуучнаар Горький, одоогийн Доод Новгород хотын 45 мянган хүний багтаамжтай “Доод Новгород” цэнгэлдэх хүрээлэнд болно. Хорватын шигшээ баг хэсэгтээ Аргентин, Исланд, Нигерийг хожиж хэсгээ тэргүүлсэн. Хэсэгтээ Аргентинийг хожсон хорватчууд хүчтэй өрсөлдөгч гэдгээр харуулсаар байна. Хорватын шигшээ баг тусгаар тогтнолоо зарласнаасаа хойш анх удаагаа 1998 оны дэлхийн аваргад оролцож шууд хүрэл медаль хүртсэн байдаг. Харин түүнээс хойш 2002, 2006, 2014 оны ДАШТ-д оролцохдоо хэсгээс гарч чадаагүй байна.

Хэсэгтээ Франц, Австралитай тэнцэж, Перуг хожсон Данийн шигшээ баг хэсгийн хоёрдугаар байраар шалгарсан. Данийн шигшээ баг 1998 оны ДАШТ-д шөвгийн наймд үлдэж байсан нь хамгийн өндөр амжилт юм. Хэсэгтээ мөн Францтай багтсан Данийн шигшээ баг шөвгийн 16-д Нигерийг хожиж, Бразилд хожигдож байжээ.

20 жилийн дараа дахин шөвгийн 16-д үлдсэн Данийн шигшээ баг энэ удаа хүчирхэг Хорватын эсрэг тоглоно.

ТОГЛОЛТЫН ХУВААРЬ

МАРГААШ

Ч.БОЛОР