ОХУ-д болж буй хөлбөмбөгийн дэлхийн аварга шалгаруулах тэмцээний хасагдах шат өнөөдрөөс эхэлнэ.

32 багаас 16 баг цааш өрсөлдөх эрхээ авсан. Хасагдах шатны эхний тоглолт өнөөдөр Улаанбаатарын цагаар 22:00-с  Франц-Аргентиний тоглолтоор эхэлнэ. Энэ тоглолт Казан хотод болно. Хоёр дахь тоглолт маргааш өглөө Уругвай-Португалын тоглолт Сочи хотод болно. 

ФРАНЦ – АРГЕНТИН

Францын шигшээ баг Дани, Австрали, Перу улсын багуудтай ‘С’ хэсэгт багтсан юм. Том багууд эхний тоглолтоос эхлэн тааруухан амжилтыг үзүүлж байсан энэ үед 1998 оны дэлхийн аварга, 2006 оны дэд аварга Францын шигшээ баг тэдний араас орсонгүй. Хэсэгтээ хоёр хожил, нэг тэнцээ хийсэн францчууд хэсгээ тэргүүлсэн. 

2014 онд Бразилд болсон 20 дахь удаагийн ДАШТ-д Францын баг шөвгийн наймд Германд дийлдэж байсан юм. 

Аргентиний шигшээ баг Хорват, Исланд, Нигерийн багуудтай ‘D’ хэсэгт багтсан. Зарим баг урьдчилсан шатанд маш хүнд тоглолтуудыг хийж Орост ирсэн билээ. Тодруулбал, “Бяцхан шидтэн” Лионель Месси тэргүүтэй Аргентины шигшээ баг Өмнөд Америкийн бүсээс маш хүнд байдлын дундаас дэлхийн аваргыг зорих эрхээ авсан юм. Тэгвэл энэ удаа ‘D’ хэсэгт Аргентиний шигшээ баг эхний тоглолтод Исландтай тэнцэж, Хорватад хожигдон хүнд байдалд байсан. Хэсгийн сүүлийн тоглолтод Нигерийг хожсоноор хэсгийн хоёрдугаар байраар шалгаран шөвгийн 16-д өрсөлдөх эрхтэй болсон.

1978, 1986 оны дэлхийн аварга Аргентины шигшээ баг хамгийн сүүлд 2014 оны Бразилд болсон ДАШТ-ий финалд Германд дийлдэн мөнгөн медаль хүртсэн юм.

УРУГВАЙ – ПОРТУГАЛ 

‘А’ хэсэгт ОХУ, Уругвай, Тунис, Панамын шигшээ багууд багтсан юм. Уругвайн шигшээ баг хэсэгтээ гурван хожил авснаар тэргүүлсэн бол ОХУ удаалсан. Уругвайн шигшээ баг 2014 онд Бразилд болсон 20 дахь удаагийн ДАШТ-д үхлийн хэсэг болох Итали, Англи, Коста-Рикагийн шигшээ багуудтай нэг хэсэгт багтсан юм. Хэсгийн хоёрдугаар байраар шалгарсан ч шөвгийн 16-д Колумбид ялагдан тэмцээнээ өндөрлүүлсэн удаатай. Энэ удаа ‘А’ хэсэгт багтаж, хожигдолгүйгээр хэсгээ тэргүүллээ. 

Уругвайн шигшээ баг 1930, 1950 оны дэлхийн аваргад түрүүлж байснаас гадна дөрвөн удаа хагас шигшээд шалгарч байсан юм. 

Дэлхийн таван удаагийн шилдэг хөлбөмбөгчин К.Роналдо тэргүүтэй Португалын шигшээ баг Испани, Иран, Марокко улстай ‘В’ хэсэгт багтсан. Испанитай тэнцэж, Марокког хожсон ч сүүлийн тоглолтод Ираныг хожин хэсгийн хоёрдугаар байраар шалгарсан. 

Португалын шигшээ баг ДАШТ-д 1966 онд гуравдугаар байранд орж байсан бол 2006 онд Германд болсон тэмцээнд дөрөвдүгээр байрыг эзэлжээ. 

ӨНӨӨДӨР

МАРГААШ

Ч.БОЛОР