ОХУ-д болж буй хөлбөмбөгийн дэлхийн аварга шалгаруулах тэмцээн талдаа орлоо. Өчигдөр G, H хэсгийн сүүлийн тоглолтууд болж, шөвгийн 16-д өрсөлдөх багууд бүрэн тодров.

КОЛУМБ, ЯПОН ШӨВГИЙН 16-Д ШАЛГАРЛАА

H хэсгээс Колумб, Японы шигшээ баг хэсгээсээ шалгарсан бол хэсгээ тэргүүлж байсан Сенегал цааш өрсөлдөх боломжгүй боллоо.  

ЯПОН–ПОЛЬШ            0:1

СЕНЕГАЛ–КОЛУМБИ 0:1

Волгоград хотод Япон-Польшийн тоглолт болж, Азийн “хөх самурай”-ууд ялагдсан ч хэсгийн хоёрдугаар байраар шалгарлаа.

Польшийн баг хоёр хожигдолтой болсноор хэсгээсээ шалгарах боломжгүй болсон юм. Хэсгийн сүүлийн тоглолтод Японтой тоглож, Беднарек 59 дэх минутад хожлын гоолыг хийлээ.

Японы шигшээ баг Польшид хожигдсон ч эхний хоёр тоглолтын дүнгээр хэсгийн хоёрдугаар байраар шалгаран шөвгийн 16-д өрсөлдөх эрхийг авлаа. Азийн орнуудын азгүйтлийн Японы шигшээ баг үргэлжлүүлж чадав.

Самара хотын “Самара Арена” цэнгэлдэх хүрээлэнд Сенегал, Колумбын шигшээ багийн тоглолт болов. Тоглолтын өмнө хэсгээ тэргүүлж байсан Сенегалд тэнцээ хийхэд хэсгээсээ гарах байсан бол Колумбын хувьд заавал гурван оноо авч байж цааш тоглох боломж гарсан. Харин энэ даалгаварыг Колумбын шигшээ баг амжилттай гүйцэтгэж, Мина 74 дэх минутад хожлын гоолыг орууллаа. Үлдсэн цагт сенегалчууд гоол хийхээр хичээсэн ч Колумбын хамгаалалтыг сэтэлж чадсангүй. Хэсгээ тэргүүлж байсан Сенегал тоглолтын үр дүнгээс шалтгаалан гуравт бичигдсэнээр гэртээ харихаар боллоо.

1. Колумб – 6 оноо (2 хожил, 1 хожигдол)
2. Япон – 4 оноо (1 хожил, 1 тэнцээ, 1 хожигдол)
3. Сенегал – 4 оноо (1 хожил, 1 тэнцээ, 1 хожигдол)
4. Польш – 3 оноо (1 хожил, 2 хожигдол)

БЕЛГИ ХЭСГЭЭ ТЭРГҮҮЛЖ, АНГЛИ УДААЛАВ

G хэсэг: 

АНГЛИ – БЕЛГИ 0:1

ПАНАМ – ТУНИС 1:2

Хэсгийн сүүлийн тоглолт болох G хэсгийн хоёр тоглолт өнгөрсөн шөнө болж, шөвгийн 16 баг бүрдлээ. Энэ хэсгээс Англи, Белги хоёр хожилтойгоор хасагдах шатанд өрсөлдөх эрхээ аваад байсан юм. Хоёр багийн тоглолт Калининград хотын цэнгэлдэх хүрээлэнд болж, Белгийн ялалтаар өндөрлөсөн. Тоглолтын цорын ганц гоолыг Белгийн Аднан Янузай 51 дэх минутад оруулж, багаа ялалтад хөтөллөө.

Белги гурван хожилтойгоор хэсгээ тэргүүлсэн бол Англи удаалав.

G хэсгийн тэргүүлсэн Белгийн шигшээ баг Ази тивийн ганц төлөөлөл Японы шигшээ багтай долдугаар сарын 2-ны өдөр тоглоно. Английн шигшээ баг Колумбитай хасагдах шатанд өрсөлдөх бөгөөд тоглолт долдугаар сарын 3-д Москва хотод болох хуваарьтай.

Энэ хэсгийн Тунис, Панамын тоглолт Саранск хотын “Мордовия Арена” цэнгэлдэхэд боллоо. Хоёр баг хэсгээсээ шалгарах боломжгүй болсон юм. Тоглолтыг 2:1-ээр Тунисын шигшээ багийн ялалтаар өндөрлөлөө.

Эдгээр тоглолтоор 21 дэх удаагийн дэлхийн аварга шалгаруулах тэмцээний хэсгийн тоглолтууд өндөрлөв. Маргаашаас эхлэн хасагдах шатны тоглолтууд болж, шөвгийн наймд өрсөлдөх багууд тодорч эхэлнэ.

Ч.БОЛОР