Стэнлийн цомын аварга Вашингтон Капиталс баг Д.Смит-Пэллитэй гэрээгээ нэг жилээр сунгалаа. Д.Смит-Пэлли 2017 оны зун Нью-Жерси Девилс багаас Вашингтон Капиталс багт ирсэн бөгөөд плэй-оффт сайн тоглож багаа стэнлийн цом хүртэхэд чухал үүрэг гүйцэтгэсэн. Чөлөөт агент болоод байсан Канад залуутай нэг жилийн нэг сая ам.долларын гэрээ байгуулжээ. Вашингтон Капиталс баг хэдхэн хоногийн өмнө хамгаалагч Ж.Карлсонтой найман жилийн 64 сая ам.долларын гэрээ байгуулаад байсан.

Энэ зун чөлөөт агент болоод буй 2009 оны драфтын тэргүүн сонголт, Нью-Йорк Айландерс багийн ахлагч Ж.Тэйвз Даллас Старс, Тампа Бэй Лайтнинг багуудаас сонголт хийж магадгүй байна. Цагтаа NHL-ийн түүхэнд орохуйц аварга том гэрээг буюу 12 жилийн 101 сая ам.долларын гэрээг үзэглэж шуугиан тарьж байсан Оросын шилдэг хоккейчин И.Ковальчук NHL-д эргэн ирж Лос-Анжелес Кингс багтай нэгдлээ. Холливудын хотын баг Орос тоглогчтой гурван жилийн 6.2 сая ам.долларын гэрээ байгуулжээ.

Питтсбург Пингвинс баг К.Шери болон М.Ханвик нарыг Баттало Сэйбрс баг руу явуулж цалингийн цэсээ чөлөөлж таван сая ам.долларын зай гаргасан байна. М.Ханвик өнгөрсөн улиралд Торонто Мейпл Лифс багаас ирж байсан ч багт төдийлөн нөлөөлөхүйц тоглолт үзүүлээгүй. Харин багийн шилдэг жигүүрийн довтлогч, сүүлийн хоёр удаагийн стэнлийн цом хүртэхэд багагүй үүрэг гүйцэтгэсэн К.Шериг ийнхүү явуулж байна. Питтсбург Пингвинс баг дээрх хоёр тоглогчийг явуулаад Баффало Сэйбрс багаас энэ оны драфтын нэг эрхийг нь авсан.

Артём Панарин хэрхэх нь тодорхойгүй байна. Чикаго Блэйкхаукс багт П.Кейнтэй гайхалтай хослолыг үүсгээд байсан Оросын залуу А.Панаринг өнгөрсөн улиралд Колумбус Блю Жакетс баг өөрийн болгосон. А.Панарин ч шинэ багтаа ажлаа сайн хийж, багтаа гоол болон оноо авалтаараа тэргүүлсэн боловч баг нь авч үлдэх хүсэлгүй байгаа бололтой. Багийн удирдлагууд эцсийн шийдвэрийг гаргах ажээ.

2018 онд “АЛДРЫН ТАНХИМ”-д элсэх эрхмүүдийг нэрийг зарлалаа. Энэ жил хоккейн “АЛДРЫН ТАНХИМ”-д дөрвөн тоглогч, хоёр спортын зүтгэлтэн багтаж байна. NHL-н Нью-Жерси Девилс багийн домогт хаалгач Мартин Бродо, Тампа Бэй Лайтнинг багийн домогт тоглогч Мартин Сент Луис, хуучин Зөвлөлтийн Александр Якушев, Олимпийн дөрвөн удаагийн аварга Канадын эмэгтэй шигшээ багийн тамирчин Жейна Хеффорд, NHL-н комиссар Гари Бэттман болон Вилли О’Ри нар нэрлэгдээд байна. Ёслолын ажиллагаа ирэх арваннэгдүгээр сард болно.  

Б.БЯМБАБАЯР