“Улаанбаатар цом 2018” сонирхогчдын боксын Олон улсын тэмцээн Улаанбаатар хотноо 2018 оны 6 дугаар сарын 20-ны өдөр “АСА цирк”-т нээлтээ хийлээ. 29 дахь удаагаа зохион байгуулагдаж буй энэхүү тэмцээнд Монгол, ОХУ, БНХАУ, Тайван, Казакстан, Киргизстан, Энэтхэг, Иран, ШриЛанк, БНАСАУ, БНСУ тэргүүтэй 12 орны 120 тамирчин хурд хүч, авхаалж самбаагаа сорин өрсөлдөж байна.

Энэхүү тэмцээнд манай улсын тамирчид зохион байгуулагч орны давуу эрхийн дагуу 4 баг болон хуваагдаж, 40 шилдэг ширэн бээлийтнээ оролцуулахаар болсон юм.

Тэмцээний нээлтийн үйл ажиллагаанд Олон улсын боксын холбооны дэд ерөнхийлөгч, Азийн боксын холбооны Ерөнхийлөгч Серик Конакбаев, Монголын боксын холбооны Ерөнхийлөгч Д.Бат-Эрдэнэ, Монголын боксын холбооны Ерөнхий нарийн бичгийн дарга Ц.Батнасан болон Биеийн тамир спортын газар, МҮОХ-ны удирдлагууд, Монголын боксын спортын ахмад тамирчид, ивээн тэтгэгч байгууллагын төлөөллүүд оролцож, нийт оролцогч тамирчиддаа амжилт хүслээ.

Энэ жил Монгол Улсад боксын спорт үүсч хөгжсөний түүхт 70 жилийн ой, Монголын боксчин Н.Энхбат Сөүлийн олимпийн наадмаас анх удаа хүрэл медаль хүртсэний 30 жилийн ой, Монголын боксчин Э.Бадар-Ууган анх удаа 2008 оны Бээжингийн олимпийн аварга болсны 10 жилийн ой тус тус тохиож байгаа билээ.

“Улаанбаатар цом 2018” Олон улсын “А” зэрэглэлийн тэмцээний Ерөнхий ивээн тэтгэгчээр Монголын боксын холбооны “Топ түнш” Капитрон банк, Ажнай групп, Ерөнхий зохион байгуулагчаар Монголын боксын холбоо, мэдээллийн ивээн тэтгэгчээр “Гэрэл плас медиа групп”, “Эх орон” телевиз зэрэг байгууллагууд хамтран ажиллаж байна.

Тэмцээн 2018.06.20-06.24-ний өдрийн хооронд АСА циркт өдөр бүр 13.00 цагаас эхлэх бөгөөд бокс сонирхогч та бүхэн хүрэлцэн ирж, тэмцээнийг үнэ төлбөргүй үзэх боломжтой. Мөн тус тэмцээнийг “Эх Орон” телевиз болон https://www.facebook.com/ehoron.hdtv фэйсбүүк хуудсаар үзэх боломжтой.

Та бүхэн хүрэлцэн ирж, Монголынхоо тамирчдаа дэмжихийг урьж байна.

МОНГОЛЫН БОКСЫН ХОЛБОО

КАПИТРОН БАНК