БНАСАУ-ын эрх баригчид өнгөрсөн даваа гаригт Өмнөд Солонгостой харилцаагаа дахин хурцатгах алхам хийлээ. Сөүлийг өдөөн хатгалга хийсэн гээд Пхеньян Кымгансан (Очир эрдэнийн уул) дахь Өмнөд Солонгосын компанийн хөрөнгийг хурааж, тэднийг улс орноосоо 72 цагийн хугацаанд гарч явахыг шаардсан юм. Энэ нь хойд Солонгосоор дамжуулан Өмнөд Солонгос руу байгалийн хийн хоолой тавих бодолтой байгаа Москвагийн энхийг бүтээх оролдлогыг нь бусниулж магадгүй болоод байна.

Кымгансаны (Очир эрдэнийн уул) ам­ралтын бүсийн ирээдүйн ту­хай асуудал нь Солонгосын хойгийн хурцатмал байдалд гал дээр тос нэмсэн хэрэг болжээ. Хойд Солонгосын Цахил­гаан мэдээний төв агентлагийн тараасан мэдэгдэлд Кымгансаны амралтын бүс дэх зочид буудлууд, зоогийн газ­рууд, татваргүй дэлгүүр, спа-төвүүд зэ­рэгт оруулсан Өмнөд Солонгосын бүх хө­рөнгийг хурааж дуудлага худалдаагаар зарна гэдгийг Пхеньян мэдэгдээд байна. Үүний зэрэгцээ Хойд Солонгос амралтын бүсэд ажиллаж байгаа өмнөд хөршийнхөө иргэдийг 72 цагийн дотор нутгаасаа гарч явахыг шаардсан аж.

“Кымгансан нь Солонгосын хойгийн хамгийн сайхан нутаг. Энэ хойгийн талаар үлгэр домог, дуу бий.  Өмнөд Солонгосын ерөнхийлөгч байсан Ким Дэ Чуны Хойд Солонгостой нэгдэх “Нарны элч” бодлогын хүрээнд хамгийн анх нэгэн төсөл хэрэгжүүлж,  амралтын бүсэд хоёр Солонгосын хамтарсан компанийг 1998 онд байгуулсан юм. Шинжээчдийн тооцоогоор тэнд жил бүр Өмнөд Солонгосын хэдэн зуун мянган жуулчид тодруулбал БНСУ-ын насанд хүрсэн иргэдийн гуравны нэг нь  очиж амардаг байжээ. 

Солонгосчуудын “Арван хоёр мян­ган очир алмаазан оргил” гэх амралтын газар очих хүмүүсийн замын тасалбарын худалдааг 2008 оны эмгэнэлт явдлын дараа зогсоосон гэдэг. Өмнөд Солонгосын жуулчин эмэгтэй санаадгүй төөрснөөсөө болоод Хойд Солонгосын хаалттай бүсэд нэвтэрч, хилчдэд  буудуулж амиа алдсан хэрэг гарсан. Тэр нь хоёр Солонгосыг нэгтгэх төлөвлөгөөтэй энэхүү том амбицтай төслийн төгсгөлийн эхлэл болсон юм. Кымгансаны амралтын бүсийн үйл ажиллагаа зогсонги байдалд орсны улмаас Хойд Солонгос хэдэн арван сая долларын хохирол амсч байна. Хамтарсан төсөлд Өмнөд Солонгосын өмнөөс оролцож байгаа “Hyundai Asan” компанийн тооцоогоор жуулчлалын  ажиллагааг зогсоосны дараа 370 сая ам.долларын хохирол амссан гэх.

Хойд Солонгосын эрх баригчид амралтын бүсийн ирээдүйн тухай яриа хэлцэл явуулах саналаа нэг биш удаа илэрхийлж байсан ч Өмнөд Солонгосын зүгээс өөрийн харьяат жуулчин эмэгтэйг хөнөөсөн хэргийнхээ төлөө албан ёсны уучлалт гуйж, хамтарсан мөрдөн байцаалт явуулсны дараа л энэ талаар ямар нэгэн хэлэлцээр явуулна гэдгээ  хэлсэн байна. Сөүлийн энэхүү шийдвэрийг БНАСАУ өдөөн хатгалга хэмээн үзэж байгаа бололтой.

Өмнөд Солонгосын хөрөнгө оруу­лалттай компанийн хөрөнгийг хураах болсон нь Сөүлд өгсөн Пхеньяны сануулга бөгөөд “хэрэв учир зүйгээ олж, тохиролцоонд хүрч чадахгүй бол бид өөрсдөө амралтын бүсийн үйл ажиллагааг дангаараа хариуцна” гэсэн Хойд Солонгосын сүрдүүлэг үзэх шинжээчид ч байна. Өнгөрсөн дөрөвдүгээр сард Хойд Солонгос  анх удаагаа “Hyundai Asan” компанитай гэрээгээ цуцалж, өөрсдөө амралтын бүсээ хөгжүүлнэ гэж мэдэгдэж байсан юм. Ирэх жил болох Хойд Солонгосыг үндэслэгч Ким Ир Сений мэндэлсний 100 жилийн ойгоор уг амралтын бүсийг  “саахаар” Хойд Солонгос яарч байна гэж шинжээчид үзэж буй. Өмнөд Солонгосын тал “Hyundai Asan” компанитай байгуулсан гэрээгээ яс барихыг шаардаж байгаа юм. Тэд Пхеньяны сүүлчийн алхамд харамсч байгаагаа илэрхийлээд Кым­ган­саны Өмнөд Солонгосын хөрөн­гийг худалдах ажиллагаанд оролц­сон ком­паниудын эсрэг олон улсын эрх зүйн арга хэмжээ авахыгаа сануулсан байна.

Даваа гаригийн дуулиан нь хоёр Солонгосыг эдийн засгийн төвшинд ойртуулах гэсэн Оросын хүчин чар­майлтыг ийнхүү унагаж байна. Мяг­мар гаригт ОХУ-ын ерөнхийлөгч Дмит­рий Медведев Улаан-Үдэд Хойд Со­лонгосын лидер Ким Чен Иртай уулзан Өмнөд Солонгос руу тавих байгалийн хийн хоолойг Хойд Солонгосоор дамжуулахын чухлыг хэлэлцэж байгаа юм. Гэтэл Пхеньянын сүүлчийн ааш аран­шингаар энэ төсөл бараг хэрэгжихгүйд хүрч болзошгүй байна.